არ დასტურდება, რომ ბილ გეითსმა კონტრაცეფტული სიმინდის პროექტი დააფინანსა

მოკლედ საკითხავი

გავრცელებული მტკიცების თანახმად, ბილ გეითსმა კონტრაცეფტული სიმინდის პროექტი დააფინანსა მსოფლიოს ჭარბი მოსახლეობის შესამცირებლად

ბილ გეითსა და პროექტს შორის კავშირები არ იძებნება

კონტრაცეფტული სიმინდის პროექტის შესახებ განახლებული ინფორმაცია 2001 წლის შემდეგ აღარ გავრცელებულა

სოციალურ ქსელში Facebook-მომხმარებელი ავრცელებს მტკიცებას, რომლის მიხედვითაც, მეცნიერებმა შექმნეს გენმოდიფიცირებული სიმინდი, რომელსაც კონტრაცეპტივის ფუნქცია ექნება. პოსტს თან ახლავს ფოტო, რომელზეც მითითებულია, რომ ამგვარი GMO სიმინდის შექმნა ბილ გეითსმა დააფინანსა. ბილ გეითსი წარსულშიც გამხდარა იმ კონსპირაციის სამიზნე, რომლის თანახმადაც, ის მსოფლიო მოსახლეობის შემცირებას გეგმავს. სავარაუდოა, რომ ამ შემთხვევაშიც გავრცელებული მტკიცება ამ კონსპირააციულ თეორიას უკავშირდება (არქივირებული ბმული).

2001 წელს ავტორიტეტულმა გამოცემამ The Guardian გამოაქვეყნა სტატია, რომელშიც გენმოდიფიცირებულ სიმინდზეა საუბარი. სტატიის მიხედვით, მეცნიერებმა შექმნეს გენმოდიფიცირებული GMO სიმინდი, როგორც კონტრაცეპტივი, რომელსაც ერთ დღესაც მსოფლიოს ჭარბი მოსახლეობისგან ხსნა შეეძლება. ამგვარი პრევენციული სიმინდი სან დიეგოს ბიოტექნოლოგიურმა კომპანიამ Epicyte-მა შექმნა, რომლის მკვლევრებმაც აღმოაჩინეს ადამიანის იმგვარი ანტისხეულების კლასი, რომლებიც სპერმას ესხმიან თავს. კერძოდ, იმუნური უნაყოფობისას ქალის სხეულის მიერ გამომუშავებული ანტისხეულების მარეგულირებელი გენების იზოლირებითა და მათი სიმინდის ნარგავებში განთავსებით Epicyte-მა შექმნა კონტრაცეპტივი სიმინდი.

ამავე სტატიაში აღნიშნულია, რომ, ჩვეულებრივ, ბიოლოგები და მეცნიერები ადამიანის ცილების მისაღებად ბაქტერიებს იყენებენ, თუმცა Epicyte-მა ამის ნაცვლად სიმინდი გამოიყენა მისი ადამიანთან მეტად მიმსგავსებული უჯრედული სტრუქტურის გამო.

ნიგერიის ბიოტექნოლოგიური საზოგადოების პრეზიდენტის (BSN), პროფესორი სილვია უზოჩუკვუს თანახმად, 2001 წელს Epicyte-ს გენმოდიფიცირებული სიმინდის პრესრელიზის შემდეგ, ამ გამოგონების შესახებ ყველანაირი განხილვა და სიახლე გაქრა. მისი თქმით, ანტი-სპერმიციდური სიმინდის შესახებ მედიაში აღარაფერი გამოქვეყნებულა და თავად კომპანია აღარ არსებობს. მართლაც, 2004 წელს ის ჩრდილოეთ კაროლინაში მოქმედმა ბიოტექნოლოგიურმა ფირმა Biolex-მა შეიძინა. თუმცა, 2012 წელს Biolex გაკოტრდა, მანამდე კი, მან თავისი ტექნოლოგიის ნაწილი Synthon-ს მიჰყიდა, ჰოლანდიურ ფარმაცევტულ კომპანიას, რომელიც Paxil-ს აწარმოებს, რომელიც ცნობილია თანდაყოლილი დეფექტების გამომწვევი წამლით. პროფესორ უზოჩუკვუს თქმით, ამჟამად არცერთი გენმოდიფიცირებული თესლი/საკვები არ შეიცავს სტერილიზაციის გენს.

ამრიგად, გენმოდიფიცირებული სიმინდისა და მისი სტერილიზაციის გენების შესახებ ინფორმაცია 2001 წელს რეალურად გამოქვეყნდა, თუმცა მის შესახებ რაიმე წინსვლა, სიახლე და განვითარების ეტაპები საჯარო წყაროებსა და მედიებში აღარ იძებნება, თავად კომპანია კი აღარ არსებობს.

რაც შეეხება ბილ გეითსის კონტრაცეფტულ სიმინდთან კავშირს, მსგავსი არ დასტურდება და იგი Epicyte-ს დაფმინანსებელთა სიაში არ გვხვდება. კომპანია 1996 წელს დაარსდა Mich Hein-ისა და Andrew Hiatt-ის მიერ. 2001 წელს კომპანიამ გამოაქვეყნა პრესრელიზი, რომ მცენარეებში ადამიანის მონოკლონური ანტისხეულების წარმოებისთვის დაფინანსების ფარგლებში მან 16 მილიონი აშშ დოლარი მოიზიდა. ინვესტორთა სიაში ვხვდები ისეთ კომპანიებს, როგორიცაა სან დიეგოს Johnson & Johnson Development Corp, Tullis-Dickerson & Co. გრინვიჩიდან, CMEA Life Sciences სან-ფრანცისკოდან, Dow Chemical Co. სან დიეგოდან და Milepost Ventures LP სან-ფრანცისკოდან. სიაში არ იძებნება ბილ გეითსის მიერ 2000 წელს დაფუძნებული ფონდი The Gates Foundation.

დამატებით, ბილ გეითსა და მის ფონდსა და კონტრაცეფტიული სიმინდის პროექტს შორის კავშირი არ იძებნება არც ერთ სანდო მედიასა და თუ ღია წყაროში.

აღსანიშნავია, რომ ბილ გეითსისა და მისი ფონდის შესახებ დეზინფორმაცია "ჯეოფაქტსს" წარსულშიც გადაუმოწმებია (1, 2, 3, 4, 5).