რა ვიცით ვიდეოს შესახებ, რომელშიც თითქოს ებრაელი ტურისტი ჩანს, რომელიც ბავშვის გატაცებას ცდილობს

სოციალურ ქსელში ვრცელდება ვიდეო, რომლის აღწერის თანახმად იტალიაში მოქალაქეებმა ებრაელი ტურისტი დააკავეს, რომელიც დედის ხელიდან ბავშვის გატაცებას ცდილობდა. ვიდეოში ჩანს მამაკაცი, რომელიც ხელს სტაცებს ბავშვს და გოგონას გატაცებას ცდილობს. (არქივირებული ბმული)

აღნიშნული ინციდენტის შესახებ იტალიურმა მედიამ გაავრცელა ინფორმაცია. მათი ცნობით, შემთხვევა ქალაქ ბერგამოში მოხდა, როდესაც რუმინეთის მოქალაქე უსახლკარო მამაკაცი მცირეწლოვანს თავს დაესხა. მედიის ინფორმაციით, შუადღის 1 საათისკენ, როდესაც მამაკაცი სუპერმარკეტში შედიოდა, დედასთან ერთად მყოფ ბავშვს ხელი სტაცა და გატაცებას ცდილობდა. ბავშვის დედამ შეძლო წინააღმდეგობის გაწევა, ბავშვის მამა, რომელიც მოშორებით იმყოფებოდა ასევე ჩაერია და საბოლოოდ შეძლეს მისი შეკავება პოლიციის მისვლამდე.

ბავშვი საავადმყოფოში გადაიყვანეს, სადაც ექსპერტიზამ მას ძვლის ტრავმა დაუდასტურა. საგამოძიებო მოქმედებების დასრულების შემდეგ რუმინეთის მოქალაქე დააკავეს, არასრულწლოვანის გატაცების მცდელობისა და მასზე ფიზიკური ზიანის მიყენების ბრალდებით. ბრალდებული ამჟამად წინასწარ პატიმრობაშია.

შესაბამისად, სოციალურ ქსელში ინფორმაცია მანიპულაციურად გავრცელდა, თითქოს ვიდეოში მყოფი მამაკაცი ებრაელი იყო. იტალიური მედიის თანახმად, ის რუმინეთის მოქალაქეა.