სოციალურ ქსელში ჯეფრი ეპსტინისა და სხვა ცნობილი ადამიანების ხელოვნურად გენერირებული ფოტო ვრცელდება

მოკლედ საკითხავი

სოციალურ ქსელში გავრცელებული ფოტო, რომელზეც ჯეფრი ეპსტინი, ბილ და ჰილარი კლინტონები და ბილ გეითსი არიან ასახულნი, ხელოვნური ინტელექტის მიერ არის შექმნილი.

ფოტოს ვიზუალური ანალიზი ხელოვნური ინტელექტისთვის დამახასიათებელ უზუსტობებზე მიუთითებს.

გუგლის ხელოვნური ინტელექტის მოდელი Gemini მასში ჩაშენებული SynthID ხელსაწყოს გამოყენებით ასკვნის, რომ ფოტო ხელოვნური ინტელექტის გამოყენებით შექმნილი ან შეცვლილია.

სოციალურ ქსელში გავრცელდა ფოტო, რომელზეც ტრეფიკინგსა და პედოფილიაში ბრალდებული, აწ უკვე გარდაცვლილი ფინანსისტი ჯეფრი ეპსტინი, ამერიკის ყოფილი პრეზიდენტი, ბილ კლინტონი, მისი მეუღლე და ამერიკის პრეზიდენტობის ყოფილი კანდიდატი, ჰილარი კლინტონი და Microsoft-ის დამფუძნებელი, მილიარდერი ბილ გეითსი არიან ასახულნი. ფოტოზე აღნიშნული პიროვნებები უცნაურ მეწამულ ანაფორებში არიან გამოწყობილნი. მათ ფონზე ვხედავთ მსგავს ანაფორებში გამოწყობილ სხვა ადამიანებს, თხებს და თეთრ სუდარებში შეფუთულ სავარაუდოდ გვამებს. ფოტოს ე.წ. დროის შტამპიც აქვს თანდართული, რომელიც თითქოსდა მიუთითებს, რომ ის 2019 წლის 26 ოქტომბერს, 23:47-ზეა გადაღებული.

გავრცელებული გამოსახულების ფოტოანაბეჭდის უკუძიება Google-ის გამოსახულებების საძიებო სისტემაში აჩვენებს, რომ იგივე ფოტო, ზოგ შემთხვევაში სხვა ფოტოებთან ერთად კომბინაციაში გავრცელდა თითქმის ყველა დიდ სოციალურ ქსელში, როგორებიცაა: ფეისბუქი; ინსტაგრამი; Threads და X.

გავრცელებული ფოტოზე არსებული ვიზუალური უზუსტობები მიანიშნებს, რომ იგი ხელოვნური ინტელექტის მიერ არის გენერირებული. მაგალითისთვის, ფოტოს მთავარი ფიგურანტების სახეების განათება არ ემთხვევა ოთახის ზოგადი ფონის განათებას, რომელიც სანთლებითაა განათებული. უცნაურად გამოიყურება ბილ კლინტონის მარჯვენა ყური, რომელიც არაბუნებრივი ზომის ჩანს. მარჯვენა მხარეს, ფოტოს ცენტრში მდგარ ორ თხას მხოლოდ ერთი თავი აქვს, რომელიც თითქოს ორს შორის საერთოა.

ფოტოს სიყალბეს ამტკიცებს ასევე ე.წ. დროის შტამპი, რომელიც 2019 წლის 26 ოქტომბერს აჩვენებს. ფოტოს მთავარმა ფიგურანტმა, ჯეფრი ეპსტინმა, 2019 წლის 10 აგვისტოს, მითითებულ თარიღამდე რამდენიმე თვით ადრე ციხეში მოიკლა თავი.

გუგლის ხელოვნური ინტელექტი Gemini ფოტოს SynthID ხელსაწყოთი ანალიზის შედეგად ასკვნის, რომ ფოტო მთლიანად ან დიდწილად ხელოვნური ინტელექტით არის შექმნილი ან მოდიფიცირებული. Gemini ამ დასკვნამდე ციფრული მონიშვნის (ე.წ. watermark-ის) აღმოჩენის შედეგად მიდის. SynthID ხელსაწყოს მეთოდოლოგიის აღწერაში განმარტებულია, რომ მსგავსი მონიშვნის ფოტოში აღმოჩენა მიუთითებს, რომ გამოსახულება შექმნილი ან შეცვლილია Google-ის ხელოვნური ინტელექტის მოდელების გამოყენებით.