ბერინგისა და დანიის სრუტეებისა და მაგადანის ჩაკეტვის შესახებ ინფორმაცია სიმართლეს არ შეესაბამება

მოკლედ საკითხავი

• სოციალურ ქსელში ბერინგისა და დანიის სრუტეებისა და მაგადანის რუსეთის მიერ ჩაკეტვის შესახებ მტკიცება ვრცელდება;

• სანდო მედიასა და ღია წყაროებში მსგავსი ინფორმაცია არ დასტურდება.

სოციალურ ქსელში ვრცელდება ინფორმაცია, თითქოს რუსეთმა ალასკის შტატსა და გრენლანდიასთან მდებარე სრუტეები, ასევე მაგადანის შესასვლელი ჩაკეტა. პოსტის ავტორი, სავარაუდოდ, აშშ-სა და რუსეთს შორის მდებარე ბერინგის სრუტესა და გრენლანდიის  კუნძულსა და ისლანდიას შორის მდებარე დანიის სრუტეზე საუბრობს.

მტკიცება, თითქოს რუსეთმა ბერინგის და/ან დანიის სრუტეები ჩაკეტა, არ დასტურდება. არც ერთ სანდო მედიასა თუ ღია წყაროს არ გაუვრცელებია ინფორმაცია რუსეთის მხრიდან მსგავსი ნაბიჯის შესახებ.

აღსანიშნავია, რომ 2019 წელს კრემლმა შეზღუდვები დაუწესა უცხოური ქვეყნების იმ სამხედრო გემებს, რომლებიც ჩრდილოეთ ზღვის მარშრუტს (NSR – Northern Sea Route) გადიოდნენ. ეს უკანასკნელი წარმოადგენს არქტიკულ მარშრუტს, რომელიც კოლას ნახევარკუნძულს ბერინგის სრუტესთან აკავშირებს. ამ პოლიტიკური ცვლილების შედეგად რუსეთის ხელისუფლება უცხოური ხომალდებისგან (12 საზღვაო მილის რადიუსში) ამ მარშრუტზე მოგზაურობის შესახებ შეტყობინებას 45 დღით ადრე ითხოვს. ამასთანავე, მისთვის ცნობილი უნდა იყოს თითოეული გემის კაპიტნის სახელი და წოდება, გემის ყველა მონაცემი. დამატებით, ამ პოლიტიკის თანახმად, ყველა გემმა ბაქანზე რუსი პილოტი უნდა მიიღოს.

ბერინგის სრუტეზე რუსეთის ზონაში აღნიშნული შეზღუდვის გარდა, სხვა ლიმიტი არ დასტურდება. ამდენად, მტკიცება, რომ რუსეთმა ალასკასთან მდებარე სრუტე ჩაკეტა, სიმართლეს არ შეესაბამება.

სანდო წყაროებსა და მედიაში არ დასტურდება არც დანიის სრუტის ჩაკეტვის შესახებ ინფორმაცია. მეტიც, რუსეთი საზღვაო ნავთობის ექსპორტის დაახლოებით 60%-ს სწორედ ბალტიის ზღვისა და ვიწრო, ადვილად კონტროლირებადი დანიის სრუტის გავლით ახორციელებს.

პოსტში ასევე მოყვანილია მტკიცება, რომ რუსეთმა მაგადანის შესასვლელი ჩაკეტა. მაგადანი მაგადანის ოლქის ადმინისტრაციული ცენტრი და რუსეთის ერთ-ერთი საპორტო ქალაქია. იგი აღმოსავლეთ რუსეთში ოხოტის ზღვის სანაპირო ზოლზე მდებარეობს.

წყარო: Gateway to Russia

სანდო წყაროებსა და მედიაში არც მაგადანის ქალაქისა თუ ოლქის ჩაკეტვის შესახებ იძებნება ინფორმაცია. ამრიგად, პოსტში გამოთქმული მტკიცებები არ დასტურდება.