ემანუელ მაკრონი მზის სათვალით თვალის დაავადების გამო ჩნდება

მოკლედ საკითხავი

• სოციალურ ქსელში ვრცელდება სპეკულაციები, თითქოს ემანუელ მაკრონს მეუღლემ სცემა და სწორედ ამის გამო უწევს მზის სათვალის ტარება;

• ფრანგულ მედიასთან ექიმმა ჯიმი მოჰამედმა პრეზიდენტის ჯანმრთელობის მდგომარეობა და გამომწვევი რისკ-ფაქტორები ახსნა;

• არც ერთ სანდო წყაროში არ დასტურდება, რომ ბრიჯიტ მაკრონს პრეზიდენტის თვალის მდგომარეობასთან რაიმე კავშირი აქვს.

სოციალურ ქსელში ვირუსულად ვრცელდება ვიდეოები (1, 2) (დაარქივებული ბმული), რომლებშიც საფრანგეთის პრეზიდენტის, ემანუელ მაკრონის, მსოფლიო ეკონომიკურ ფორუმზე მზის სათვალით გამოსვლაა ასახული. ვიდეოებს თან ახლავს აღწერები, რომლებიც მიანიშნებს, რომ პრეზიდენტი სათვალით ცოლის ძალადობის შედეგად გაჩენილ კვალს ფარავს.

2026 წლის 15 იანვარს შეიარაღებულ ძალებთან ყოველწლიურ მისალოც შეხვედრაზე საფრანგეთის პრეზიდენტმა ჯარისკაცებს მიმართა, რა დროსაც მას  მარჯვენა თვალი  ჩაწითლებული ჰქონდა. მიმართვის დროს მან ხუმრობით საკუთარი დაზიანება „ვეფხვის თვალს“ (Eye of the Tiger) შეადარა, როგორც მიზანდასახულობის სიმბოლო და აუდიტორიას თვალის „უსიამოვნო“ შესახედაობისთვის ბოდიშიც მოუხადა.

წყარო: RTL

აღნიშნული შემთხვევის შემდეგ, ემანუელ მარკონი ყველა საჯარო შეკრებაზე მზის სათვალით ჩნდება, მათ შორის, 20-22 იანვარს დავოსში გამართულ მსოფლიო ეკონომიკურ ფორუმზეც. მისი საჯაროდ, სათვალით გამოჩენის შემდეგ ქართულენოვან სოციალურ ქსელში არაერთი სპეკულაცია დაიწყო, თითქოს პრეზიდენტს სცემეს, უფრო კონკრეტულად კი, მეუღლემ სცემა.

წყარო: abcnews

სინამდვილეში, ლოკალური ფრანგული მედიის ცნობით, პრეზიდენტ მაკრონთან დაახლოებული წყაროების თანახმად, მას თვალში სისხლძარღვი გაუსკდა და სწორედ ამან გამოიწვია თვალის სიწითლე და მოგვიანებით მზის სათვალით სიარულის აუცილებლობა. Radio Télévision Luxembourg-თან ექიმი ჯიმი მოჰამედი მიუთითებს, რომ „პრეზიდენტს აქვს სუბკონიუნქტივალური სისხლდენა, კეთილთვისებიანი მდგომარეობა. თვალის წინა ნაწილში არის კონიუნქტივა, პატარა, გამჭვირვალე მემბრანა. ის ფარავს თვალის ცილას. ამ ადგილას არის ძალიან პატარა, ზედაპირული სისხლძარღვი, რომელიც შეიძლება გასკდეს და თვალის ცილაზე წარმოქმნას წითელი ლაქა”. მისივე თქმით, „ეს მდგომარეობა კეთილთვისებიანია, რადგან მხოლოდ თვალის ზედაპირს აზიანებს. თვალის შიგნით კი სისხლდენას არ იწვევს. ეს ნიშნავს, რომ ამ დროს ადამიანი არ განიცდის ტკივილს ან მხედველობის პრობლემებს. სუბკონიუნქტივალური სისხლდენა იზოლირებულად ხდება და სპონტანურად ქრება ყოველგვარი ჩარევის გარეშე“.

ექიმი მოჰამედი ასევე ხაზს უსვამს, რომ აღნიშნული სისხლძარღვები ძალიან სუსტია და ადვილად სკდება. მთავარი რისკ-ფაქტორი კი ასაკის მატებაა, ვინაიდან სისხლძარღვები ასაკთან ერთად უფრო სუსტდება. რისკ-ფაქტორებს განეკუთვნება ასევე მაღალი არტერიული წნევა, ზოგიერთი მედიკამენტი, მაგალითად ასპირინი. ექიმი მიუთითებს მექანიკურ ფაქტორებზეც – ძლიერი ხველა, თვალში ხელის ამოსმა. მისივე მტკიცებით, აღნიშნული მდგომარეობა ზედმეტი ჩარევის გარეშე ორ კვირაში გადის.

დამატებით, არც ერთ სანდო მედიასა თუ ღია წყაროში არ იძებნება ინფორმაცია იმის შესახებ, რომ ემანუელ მაკრონის თვალის პრობლემასთან მის მეუღლეს რაიმე კავშირი აქვს.

ამდენად, მტკიცება, რომ ემანუელ მაკრონი ცოლისგან მიყენებული ტრავმის გამო ატარებს სათვალეს, არ დასტურდება.