სოციალურ ქსელში აქტივისტ დავით სეხნიაშვილის ინტერვიუ კონტექსტის გარეშე ვრცელდება

სოციალურ ქსელში ვირუსულად ვრცელდება ვიდეო (1, 2, 3, 4, 5, 6, 7) (დაარქივებული ბმული), რომელშიც პრო-ევროპული საპროტესტო აქციიდან აქტივისტი დევით სეხნიაშვილი ტვ პირველთან საუბრობს. ინტერვიუს ფრაგმენტში აქტივისტი ამბობს: „ჩვენ ბევრად უფრო მეტი გვაქვს დასაკარგი და ჩვენ არ ვიბრძვით აქ რაღაცა 100 და 150 ლარისთვის, ჩვენ აქ ვიბრძვით უფრო მეტისთვის“. სოციალური ქსელის მომხმარებლები აღნიშნულ ფრაგმენტს იმგვარად ავრცელებენ, თითქოს აქციის მონაწილეს საპროტესტო აქციებზე თანხის აღების შესახებ ინფორმაცია წამოსცდა. სინამდვილეში, ვიდეო კონტექსტის გარეშე ვრცელდება.

2025 წლის 8 სექტემბერს ტელეკომპანია „ტვ პირველი“ თბილისში, მელიქიშვილის გამზირზე, კახა კალაძის საარჩევნო შტაბთან მიმდინარე მოვლენებს აშუქებდა. ჟურნალისტი პირდაპირ ეთერში სხვადასხვა აქტივისტს გაესაუბრა, მათ შორის დავით სეხნიაშვილს. აქტივისტი მელიქიშვილის გამზირზე მოქალაქეებსა და „ქართული ოცნების“ მხარდამჭერებს შორის დაპირისპირებაზე საუბრობს და აცხადებს (54:25):

„დიახ, ეშინიათ, დიახ, ეშინიათ იმისი, რომ ძალიან ბევრი ვართ, ეშინიათ იმისი, რომ ჩვენ ბევრად უფრო მეტი გვაქვს დასაკარგი და ჩვენ არ ვიბრძვით აქ რაღაცა 100 და 150 ლარისთვის. ჩვენ აქ ვიბრძვით უფრო მეტისთვის და ყოველთვის, როდესაც ადამიანს იდეა ამოძრავებს, ის ადამიანი ბევრად უფრო საშიშია, ვიდრე ეს რაღაც დაქირავებული ძალით „ძველი ბიჭები“. კი, ეს ყველაფერი ხდება იმიტომ, რომ ეშინიათ; ეს ყველაფერი ხდება იმიტომ, რომ 4 ოქტომბერს ამათ მშვიდობიანად დავამხობთ“.

ამდენად, სრულ ინტერვიუში ჩანს, რომ დავით სეხნიაშვილი პროტესტის მონაწილეებს იდეისთვის მებრძოლებად ახასიათებს, ხოლო ფულის სანაცვლოდ დაქირავებულებში  „ქართული ოცნების“ მხარდამჭერებს მოიაზრებს. მისი ციტატის ნაწილი „ჩვენ არ ვიბრძვით აქ რაღაცა 100 და 150 ლარისთვის. ჩვენ აქ ვიბრძვით უფრო მეტისთვის“,  სოციალურ ქსელში კონტექსტის გარეშე ვრცელდება. მსგავსი გავრცელება მომხმარებლებს მცდარ შთაბეჭდილებას უქმნის, თითქოს სეხნიაშვილ „მეტისთვის ბრძოლაში“ მეტ თანხას გულისხმობდა, მაშინ, როდესაც ის სინამდვილეში, იდეისთვის ბრძოლაზე საუბრობდა.