პოლიტიკოს გია ჯაფარიძის ვიდეო სოციალურ ქსელში კონტექსტის გარეშე ვრცელდება
მოკლედ საკითხავი
ქართულ ფეისბუქ სივრცეში გავრცელებული ვიდეოს მტკიცებით, ის ასახავს გია ჯაფარიძის რეაქციას ხელისუფლების დამხობის მცდელობის მომდევნო დღეს.
ვიდეოს სრული კონტექსტი გვიჩვენებს, რომ ჯაფარიძის ემოციები 2022 წლის ზაფხულში ევროკავშირის მიერ საქართველოსთვის კანდიდატის სტატუსის არ მინიჭებას უკავშირდება.
ქართულ ფეისბუქ სივრცეში გავრცელდა პოლიტიკოს გია ჯაფარიძის ვიდეო, სადაც მას ტელეკომპანია პირველის გადაცემა "რეაქციის" წამყვანი ინგა გრიგოლია მიმართავს და ეკითხება "ცრემლები მოგდით? გეტირებათ?" რის შემდეგაც კადრში ჩანს სავარაუდოდ მართლაც თვალზე ცრემლებ მომდგარი გია ჯაფარიძე (დაარქივებული ბმული). ვიდეოს გამავრცელებელი აღწერაში წერს: "28 ნოემბერს დაგვიანონსეს დამხობა.. 29 ნოემბერი:" რითაც ირიბად მიუთითებს, რომ ჯაფარიძის ცრემლები ე.წ. "დამხობის" წარუმატებელი მცდელობით არის გამოწვეული.
გავრცელებული ვიდეოს მონაკვეთი ამოღებულია ტელეკომპანია პირველის ეთერში 2022 წლის 23 ივნისს გასული გადაცემა "რეაქციიდან" (ვიდეოში 38:50-ზე), სადაც განიხლვის მთავარი საგანი ევროკავშირის მიერ საქართველოსთვის კანდიდატის სტატუსის არ მინიჭება იყო. ამის საპირწონედ ე.წ. ასოცირებული ტრიოს დანარჩენმა ორმა წევრმა, უკრაინამ და მოლდოვამ, კანდიდატის სტატუსი სწორედ ამ დღეს მიიღეს.
სწორედ ზემოთ აღწერილ კონტექსტში გაი ჯაფარიძე იხსენებდა საუბარს თავის შვილთან, რომელმაც ჰკითხა, როგორი იქნებოდა საქართველო რამდენიმე წლის შემდეგ და ღირდა თუ არა საქართველოში ცხოვრების გაგრძელება, მიმდინარე მოვლენების გათვალისწინებით. აღნიშნულზე საუბრისას, გია ჯაფარიძემ საუბრის გაგრძელება დროებით აღარ ისურვა. ამ ყველაფრის შემდეგ, წამყვანმა ინგა გრიგოლიამ მიმართა ჯაფარიძეს: "ცრემლები მოგდით? გეტირებათ?" და აღნიშნა, რომ რთულია ამ საკითხებზე საუბარი.
