სოციალურ ქსელში სტოლტენბერგის ციტატა შეცვლილი სახით ვრცელდება
სოციალურ ქსელში მომხმარებელი ავრცელებს პოსტს, რომლის მიხედვითაც, ნატოს ყოფილმა გენერალურმა მდივანმა თითქოს ბოლო უკრაინელამდე ბრძოლის მოწოდება გააჟღერა. პოსტში ვკითხულობთ: „ფაქტია, რომ მთელ ევროპას ფეხებზე ჰკიდიათ უკრაინელი ხალხი!“ (არქივირებული ბმული).
პოსტს თან ერთვის ფოტო, რომელზეც დატანილია CGTN-ის რუსულენოვანი გამოცემის ლოგო. CGTN ჩინური სახელმწიფო მედიაა და მის ოფიციალურ რუსულენოვან ფეისბუქ გვერდზე ამ შინაარსის პოსტი ნამდვილად არის განთავსებული (არქივი). პოსტის აღწერაში ვკითხულობთ:
„«არ შეიძლება რუსეთს მივცეთ უფლება მიაღწიოს წარმატებას“: ნატოს ექს-მეთაური სტოლტენბერგი ბოლო უკრაინელამდე ომისკენ მოუწოდებს.
„ჩვენი მხარდაჭერა უკრაინისადმი, ეს არ არის სიყვარულის გამოვლინება. ეს არის ინვესტიცია ჩვენს საკუთარ უსაფრთხოებაში და თავისუფალი და დემოკრატიული ევროპის მომავალში. ჩვენ არ შეიძლება მივცეთ უფლება რუსეთს წარმატებას მიაღწიოს. ბრძოლა თავისუფლებისთვის უნდა გაგრძელდეს“, - განაცხადა სტოლტენბერგმა.
მოცემული ციტატა სტოლტენბერგის განცხადების შესახებ მეტ ინფორმაციას გვაძლევს. ციტატიდან ცხადია, რომ ფოტოზე დატანილი წარწერა, რომ ნატოს ყოფილი გენმდივანი ბოლო უკრაინელამდე ბრძოლისკენ მოწოდებას აჟღერებს, მედიის მხრიდან პოლიტიკოსის განცხადების მანიპულირებული ინტერპრეტაციაა. ციტატის მიხედვით, სტოლტენბერგი რუსეთის გამარჯვების დაუშვებლობასა და თავისუფლებისთვის ბრძოლის გაგრძელებაზე საუბრობს. CGTN-ის პოსტი საშუალებას გვაძლევს განცხადების პირველწყაროს მივაკვლიოთ.
ნატოს ყოფილმა გენმდივანმა და ნორვეგიის ამჟამინდელმა ფინანსთა მინისტრმა მოცემული განცხადება 23 ოქტომბერს უნგრეთში გააკეთა. სტოლტენბერგი უნგრეთის რევოლუციის 70 წლისთავზე სიტყვით გამოვიდა და გაავლო პარალელი საბჭოთა რეპრესიებსა და უკრაინის წინააღმდეგ ახლა მიმდინარე ომს შორის. სრულ გამოსვლაში სტოლტენბერგმა უნგრეთის დედაქალაქში 1956 წლის ოქტომბერ-ნოემბერში განვითარებული მოვლენები გაიხსენა. 1956 წელს ფართომასშტაბიანი საპროტესტო მოძრაობა დაიწყო, რაც ნოემბერში საბჭოთა კავშირმა ძალის გამოყენებით, მათ შორის - ტანკების საშუალებით ჩაახშო.
იენს სტოლტენბერგმა სწორედ ამ კონტექსტში უკრაინის თავისუფლების ბრძოლა შეადარა უნგრეთის თავისუფლებისთვის ბრძოლას, რაც საბოლოოდ დასრულდა უნგრეთის დამოუკიდებლობითა და ნატოსა და ევროკავშირის წევრობით (მე-6 წუთიდან). „ჩვენი მხარდაჭერა უკრაინისადმი, ეს არ არის სიყვარულის ქველმოქმედება. ეს არის ინვესტიცია ჩვენს საკუთარ უსაფრთხოებაში და თავისუფალი და დემოკრატიული ევროპის მომავალში. ჩვენ არ შეიძლება მივცეთ უფლება რუსეთს წარმატებას მიაღწიოს. ბრძოლა თავისუფლებისთვის უნდა გაგრძელდეს“, - განაცხადა სტოლტენბერგმა. შესაბამისად, ნატოს ყოფილი გენერალური მდივანი რუსეთის წარმატების დაუშვებლობასა და თავისუფლებისთვის ბრძოლის გაგრძელების აუცილებლობაზე საუბრობს. მისი სრული გამოსვლის მოსმენა ცხადს ხდის, რომ მას ფოტოზე დატანილი ან პოსტში მოცემული მტკიცების შინაარსის მქონე განცხადება არ გაუკეთებია.
