სოციალურ ქსელში გია ბუღაძის კომენტარი მანიპულაციურად ვრცელდება
მოკლედ საკითხავი
ქართულ ფეისბუქ სივრცეში ვრცელდება ვიდეო მტკიცებით, რომ გია ბუღაძეს საქართველოს ომის მდგომარეობაში ყოფნა სურს.
გია ბუღაძის კომენტარის ანალიზი გვიჩვენებს, რომ ის ომზე საერთოდ არ საუბრობდა.
ქართულ ფეისბუქ სივრცეში გავრცელდა ვიდეოს ფრაგმენტი, რომელშიც მხატვარი გია ბუღაძე საუბრობს აშშ-ის, ისრაელისა და უკრაინის თანამშრომლობის შესაძლო ფორმატის არსებობის შესახებ (დაარქივებული ბმული). ბუღაძე ამბობს, რომ საქართველოსაც დიდი სიამოვნებით იხილავდა მსგავს ფორმატში. ვიდეოს თან ახლავს აღწერა: "სამივე ქვეყანა ომშია და ეს ნატრულობს საქართველოც იქ მინდაო", რითიც ავტორი ირიბად მიუთითებს, რომ ბუღაძე აღნიშნული ციტატით საქართველოს ომში ჩართვას უჭერს მხარს.
გია ბუღაძემ გავრცელებულ ვიდეოს ფრაგმენტში ასახული კომენტარი ტელეკომპანია პირველის გადაცემა "რეაქციაში" სტუმრობისას გააკეთა, 2026 წლის 28 ივლისს. თემა, რომელზეც ბუღაძე ჩვენი სტატიისთვის რელევანტური კომენტარის გაკეთებამდე საუბრობდა, კომედიანტების მიმართ ძალადობის შემთხვევები იყო საქართველოში.
გია ბუღაძემ სწორედ ამ საკითხთან შესაპირისპირებლად დაიწყო საუბარი მსოფლიოში განვითარებულ მოვლენებზე და თქვა, რომ სანამ საქართველოში მსგავსი სიტუაციაა, მან შეიტყო გამოჟონილი, ჯერ ბოლომდე დაუდასტურებელი ინფორმაციის შესახებ, რომ შესაძლოა მზადდებოდეს აშშ-ის, ისრაელისა და უკრაინის თანამშრომლობის ფორმატი. მისი საუბრიდან აშკარაა, რომ ბუღაძე ამ ქვეყნებს შორის თანამშრომლობის პერსპექტივას იწონებს და ამბობს, რომ საუკეთესო შემთხვევაში ისურვებდა საქართველოც ენახა მსგავსი ფორმატის წევრად. მსგავსი შესაძლო ალიანსების ფორმირების კონტექსტში კი, ბუღაძე წუხს, რომ ამ დროს საქართველო მსოფლიო პოლიტიკიდან და თანამშრომლობის ფორმატებიდან იზოლირებულია.
ბუღაძე ამ კომენტარის გაკეთებისას არსად ახსენებს ომს ან ომში მონაწილეობას. ის არ ამბობს, რომ შემოთავაზებული ფორმატი სამხედრო თანამშრომლობას შეეხება. შესაბამისად, მცდარია მინიშნება, თითქოს ბუღაძე ომის კონტექსტში საუბრობდა.
