სოციალურ ქსელში უკრაინის საკალათბურთ ნაკრების მოქმედების შესახებ მცდარი ინფორმაცია ვრცელდება
სოციალურ ქსელ „ფეისბუქში“ ვრცელდება ფოტო, რომელზეც ჰიმნის შესრულების დროს უკრაინის ნაკრების მოქმედებაა გამოსახული. ფოტოს ავტორის მტკიცებით, უკრაინის ნაკრების კალათბურთელებმა „ზურგი შეგვაქციეს ჰიმნის თქმის დროს“ (არქივირებული ბმული).
საქართველო-უკრაინის საკალათბურთო მატჩი 2 ივლისს რიგაში გაიმართა. მატჩის დასაწყისში როგორც უკრაინის, ასევე საქართველოს ნაკრების მოთამაშეები ერთი მიმართულებით დადგნენ. სინამდვილეში, როგორც საქართველოს, ასევე უკრაინის ნაკრების მოთამაშეები ერთი მიმართულებით იყურებიან. მაყურებელთა ნაწილიც სწორედ ამ მიმართულებით არის შებრუნებული. სპორტული ღონისძიებების დროს, ქვეყნის ეროვნული ჰიმნის შესრულებისას ეროვნული დროშისკენ სახით დგომა მსოფლიოში გავრცელებული პრაქტიკაა.
აღსანიშნავია ისიც, რომ მატჩის დასაწყისში, არათუ ჰიმნისადმი უპატივცემულობა ან რაიმე ტიპის კრიტიკული ქცევა ყოფილა უკრაინელთა მხრიდან, არამედ მოთამაშეები და მწვრთნელები ერთმანეთს მეგობრულად მიესალმნენ, ხოლო უკრაინელთა და ქართველთა მთავარმა მწვრთნელებმა ბაგატსკისმა და ჯიკიჩმა სამახსოვროდ ეროვნული სიმბოლიკის პინები გაცვალეს.
მატჩის დასაწყისში უკრაინელთა მხრიდან განხორციელებული რაიმე საპროტესტო პერფორმანსის შესახებ ინფორმაცია არც უკრაინის საკალათბურთო ფედერაციისა და არც საქართველოს კალათბურთის ფედერაციის ოფიციალურ საიტებზე არ იძებნება.
დამატებითი ინფორმაციის მისაღებად "ჯეოფაქტსი" უკრაინის კალათბურთის ასოციაციას დაუკავშირდა. ფედერაციამ მომხდარი შემდეგნაირად განმარტა: "საქმე ისაა, რომ მოცემულ არენაცე დროშები იმგვარადაა განთავსებული, რომ ეროვნული ჰიმნის დროს გუნდს მათკენ შებრუნება უწევს. ყველა ეროვნული გუნდი, რომელიც ამ არენაზე თამაშობს, ბრუნდება დროშისკენ და, შესაბამისად, ზურგს აქცევს მოწინააღმდეგე გუნდს. მაგალითად, საქართველო-უკრაინის თამაშის შემდეგ ამ არენაზე ისრაელი გერმანიის თამაში გაიმართა. ეროვნული ჰიმნის დროს ისრაელის მოთამაშეები ასევე შებრუნდნენ დროშისკენ და ზურგი შეაქციეს გერმანიის ნაკრებს. ეს ამ დარბაზის განსხვავებული მახასიათებელია".
უკრაინა-საქართველოს მატჩი რიგაში, ქსიაომი არენაზე გაიმართა. უკრაინის საკალათბურთო ფედერაციის განცხადების გადასამოწმებლად ჩვენ ამ არენაზე სულ ბოლოს ჩატარებული მატჩი მოვიძიეთ. 6 ივლისს ამ დარბაზში ერთმანეთს ლატვიისა და ავსტრიის ნაკრებები დაუპირისპირდნენ. მატჩის დასაწყისში, ეროვნული ჰიმნების შესრულების დროს, ლატვიის მოთამაშეები ზუსტად ასევე იქცევიან - სახით ბრუნდებიან დროშის მხარეს და "ზურგს აქცევენ" მოწინააღმდეგე გუნდის მოთამაშეებს.
ამდენად, ინფორმაცია, რომ უკრაინელმა კალათბურთელებმა საქართველოს ნაკრების მოთამაშეებს ეროვნული ჰიმნის შესრულების დროს ზურგი შეაქციეს, სიმართლეს არ არის. სინამდვილეში, მსოფლიოში გავრცელებული პრაქტიკის შესაბამისად, კალათბურთელები ჰიმნის შესრულების დროს სახით დროშისკენ იდგნენ.
