სოციალურ ქსელში ირაკლი კობახიძის გაყალბებული ციტატა ვრცელდება

სოციალურ ქსელ "ფეისბუქში" გავრცელდა საინფორმაციო ბარათი, რომელშიც პრემიერ ირაკლი კობახიძეს შემდეგი ციტატა მიეწერება: "არაბები ისტორიულად ჩვენი ძმები იყვნენ და მათ შეუძლიათ დასახლდნენ საქართველოში". ბარათს ტელეკომპანია "მთავარის" ლოგო და ვიზუალი აქვს, რაც გავრცელებულ პოსტს დამატებით დამაჯერებლობას სძენს (არქივირებული ბმული).

ტელეკომპანია "მთავარის" ფეისბუქ გვერდზე გასული კვირების განმავლობაში მსგავსი პოსტი არ იძებნება. Google-ის საძიებო სისტემაში აღნიშნული ციტატით ძებნისას არ გვხვდება სანდო ბმული, რომელიც დაადასტურებდა, რომ ციტატა ირაკლი კობახიძეს ეკუთვნის.

გავრცელებული საინფორმაციო ბარათის სიყალბეზე მიუთითებს ისიც, რომ, როგორც წესი, "მთავარის" ორიგინალ პოსტებზე ტექსტი თეთრ ფონზე არ არის დატანილი (შედარებისთვის იხილეთ "მთავარის" მიერ გამოქვეყნებული საინფორმაციო ბარათი)

აღნიშნული ყალბი ციტატა სოციალურ ქსელში გასულ წელსაც გავრცელდა და მას ფაქტების გადამმოწმებელი ორგანიზაცია "მითების დეტექტორი" გამოეხმაურა. ორგანიზაციის კვლევით დადგინდა, რომ ყალბი ვერსია ტელეკომპანია "მთავარის" 2025 წლის ნოემბერში გამოქვეყნებული საინფორმაციო ბარათის რედაქტირებით შეიქმნა (არქივი). ორიგინალ პოსტში ირაკლი კობახიძის შემდეგი ციტატაა დატანილი: "მინდა, რომ დავიწყოთ მუშაობა ქვეყნის განვითარების 10 წლიან სტრატეგიაზე".

ამდენად, არაბების ჩამოსახლების შესახებ ციტატა ირაკლი კობახიძეს არ ეკუთვნის.