გავრცელებული ვიდეო მართვის მოწმობის პრაქტიკულ გამოცდაში განზრახ ჩაჭრაზე AI გენერირებულია

სოციალურ ქსელში ტელეკომპანია "იმედის" საინფორმაციო გამოშვების ვიზუალით ვრცელდება ვიდეო, რომელიც ამტკიცებს, რომ მართვის მოწმობის გამოცდაზე ადამიანებს მიზანმიმართულად ჭრიან, რათა სახელმწიფო ბიუჯეტში მეტი ფული შევიდეს. ვიდეოში ჩანს ქრონიკის წამყვანის ნათია სონღულაშვილის გამოსახულებაც, რაც გავრცელებულ მასალას მეტ დამაჯერებლობას სძენს.

სოციალურ ქსელში გავრცელებულ ვიდეოზე დატანილია TikTok ანგარიშის სახელი - bb.basa, რაც მიანიშნებს, რომ ვიდეოს პირველწყარო TikTok არხია. აღნიშნულ არხზე მართლაც იძებნება ვიდეო სათაურით "მართვის მოწმობა თუ ლეგალური რეკეტი", სადაც საქართველოში მართვის მოწმობის პრაქტიკული გამოცდის დროს ადამიანების განზრახ ჩაჭრაზეა საუბარი. გამავრცელებელ არხს bb.basa არხის აღწერაში მითითებული აქვს, რომ ის გასართობ საინფორმაციო გვერდს წარმოადგენს, სადაც ხელოვნური ინტელექტით შექმნილი რეალისტური ვიდეოები ქვეყნდება. ამდენად, მართვის მოწმობის შესახებ გავრცელებული ვიდეოც, დიდი ალბათობით, AI-შექმნილია.

გარდა TikTok-არხის აღწერის ველში არსებული მითითებისა, ვიდეოში ხელოვნური ინტელექტის კვალზე რამდენიმე მახასიათებელი მიანიშნებს. მაგალითად, თვალშისაცემი უზუსტობაა, რომ ჟურნალისტის პირის მოძრაობა და ვიდეოში არსებული ხმოვანი ნაწილი ერთმანეთს არ ემთხვევა. დამატებით, ვიდეოში მე-19 წამზე გამოსახული ადამიანების ვიზუალი ზედმეტად პრიალა და გლუვია, რაც ხელოვნური ინტელექტით შექმნილი მასალების ერთ-ერთი მახასიათებელია.

დამატებით, "ჯეოფაქტსმა" ტელეკომპანია იმედის სოციალურ ქსელებსა და ვებგვერდზე ვერ მიაკვლია მსგავსს ინფორმაციას, სადაც ტელევიზიამ მართვის მოწმობის გამოცდაში მოქალაქეების განზრახ ჩაჭრაზე ინფორმაცია გამოაქვეყნა.

ამდენად, სინამდვილეში სოციალურ ქსელში გავრცელებული ვიდეო ხელოვნური ინტელექტის მიერ არის შექმნილი.