უკრაინაში სკოლის მოსწავლეებს უკრაინელი ოლიმპიელების მხარდასაჭერად ჩაფხუტების ტარებას არ აიძულებდნენ
მოკლედ საკითხავი
სოციალურ ქსელში გავრცელდა ინფორმაცია, რომ უკრაინელ სკოლის მოსწავლეებს ლუცკში სპეციალური ფორმების ჩაცმასა და ე.წ. ხსოვნის ჩაფხუტის ტარებას აიძულებდნენ, უკრაინელი ოლიმპიელების მხარდასაჭერად.
ინფორმაცის თან ერთვის ფოტოები.
თანდართული ფოტოები პროგრამულად დამუშავებულია, საფუძვლად კი 2019 წლით დათარიღებული ფოტოებია გამოყენებული.
სოციალურ ქსელში გავრცელდა ინფორმაცია, რომ უკრაინელ სკოლის მოსწავლეებს ლუცკში უკრაინელი ოლიმპიელების მხარდასაჭერად სპეციალური ფორმების ჩაცმასა და ე.წ. ხსოვნის ჩაფხუტის ტარებას აიძულებდნენ (არქივირებული ბმული).
ზემოთ მოცემული ფოტოების უკუძიებას საძიებო სისტემების მეშვეობით უკრაინის სოფელ გლუშიცკის გიმნაზიის ოფიციალურ ვებგვერდამდე მივყავართ. აღნიშნულ გვერდზე განთავსებულია ფოტოების თავდაპირველი ვერსიები, სადაც ბავშვებს ჩაფხუტები არ აფარიათ. გვერდზე განთავსებული პოსტი, ფოტოების ჩათვლით, 2019 წლის 21 მაისით არის დათარიღებული, ხოლო ასახული ღონისძიება კი იმავე წლის 16 მაისით.
ვებგვერდზე ასევე განმარტებულია თუ რას უკავშირდება ბავშვების განსაკუთრებული ჩაცმულობა. ღონისძიება უკრაინის ეროვნული ტანსაცმლის, ვიშივანკის დღის აღსანიშნავად გაიმართა. ფოტოებში ბავშვებს სწორედ ვიშივანკები აცვიათ.
აღნიშნული დეზინფორმაციის გავრცელება, სავარაუდოდ, უკავშირდება უკრაინელი სკელეტონისტის, ვლადისლავ ჰერასკევიჩის ამბავს, რომელსაც 2026 წლის მილანო კორტინას ზამთრის ოლიმპიური თამაშებზე დისკვალიფიკაცია მისცეს. აღნიშნული უკავშირდებოდა ჰერასკევიჩის მიერ სპეციალური ჩაფხუტის ტარებას, რომელზეც უკრაინის წინააღმდეგ რუსეთის მიერ წამოწყებულ ომში დაღუპული უკრაინელი სპორტსმენების ფოტოები იყო ასახული. მიუხედავად საერთაშორისო ოლიმპიური კომიტეტის მხრიდან გაფრთხილებისა, ჰერასკევიჩმა უარი თქვა სხვა ჩაფხუტის გამოყენებაზე, რის შემდეგაც მან ოლიმპიადიდან დისკვალიფიკაცია მიიღო. პროგრამულად დამუშავებული ფოტოების გავრცელების მიზანი ისეთი შთაბეჭდილების შექმნაა, თითქოს უკრაინა სკოლის მოსწავლეებს აიძულებდა სკელეტონისტ ჰერასკევიჩისთვის ჩაფხუტების ტარებით დაეჭირათ მხარი.
აღნიშნულ დეზინფორმაციას უკრაინული Gwaramedia და Stop Fake-ც გამოეხმაურნენ.
