შეიძინა თუ - არა ზელენსკიმ P-Diddy-ის სასახლე?
მოკლედ საკითხავი
მტკიცება, რომ ზელენსკიმ P.Diddy-ის სასახლე შეიძინა არ დასტურდება.
მტკიცებულებად მოყვანილია ვიდეო ამერიკული ტაბლოიდის TMZ-ის ლოგოთი, თუმცა TMZ-ის ვებგვერდსა და სოციალურ ქსელებში მსგავსი ინფორმაცია არ იძებნება.
ვიდეოში ნაჩვენებია შესყიდვის დოკუმენტი, თუმცა მსგავსი დოკუმენტის ფოტო ინტერნეტსივრცეში მარტივად იძებნება.
არ დასტურდება ინფორმაცია იმის შესახებ, რომ P.Diddy-ს სახლი გაიყიდა.
სოციალურ ქსელში ვრცელდება მტკიცება, რომლის თანახმადაც უკრაინის პრეზიდენტმა ვოლოდიმირ ზელენსკიმ ამერიკელი პროდიუსერისა და რეპერის შონ კომბსის (იგივე P.Diddy) სასახლე 61 მილიონ დოლარად შეიძინა. იდენტური მტკიცება რუსულენოვანმა მედიებმა და სოციალური ქსელის ანგარიშებმაც ვირუსულად გაავრცელეს. (1; 2; 3; არქივირებული ბმული)
მტკიცებულებად მოყვანილია ვიდეო, რომელიც თითქოს ამერიკულ ტაბლოიდს TMZ-ის ეკუთვნის და მათ ექსკლუზიურად მოიპოვეს შესყიდვის ხელშეკრულება.
სინამდვილეში, ვიდეო მრავალ უზუსტობას შეიცავს.
პირველ რიგში, საგულისხმოა, რომ TMZ-ის ვებგვერდსა და სოციალურ ქსელებში (Instagram; Facebook; X; YouTube) ზელენსკის მიერ P.Diddy-ის სახლის შეძენასთან დაკავშირებით ინფორმაცია არ იძებნება. მსგავსი ინფორმაცია არც სხვა მედიებს გაუვრცელებიათ. მტკიცებას და ვიდეოს მხოლოდ სოციალური ქსელის არასანდო ანგარიშები ავრცელებენ. (1; 2; 3)
ვიდეოში ასევე ნათქვამია, რომ TMZ-მ მოიპოვა ხელშეკრულება, რომელსაც ხელს P.Diddy-ის მარჯვენა ხელი ტარიკ ბრუკსი და კვიპროსული კომპანია Aldoante LTD-ის დირექტორი სვეტლანა პიშანსკა აწერენ. აღსანიშნავია, რომ მსგავსი ვიზუალის დოკუმენტის მოძიება ინტერნეტსივრეში ძალიან მარტივია. (იხ. ფოტოები)
ფოტო სოციალურ ქსელში გავრცელებული ვიდეოდან
ფოტო ინტერნეტიდან
რაც შეეხება, სახლს, რომელიც თითქოს უკრაინის პრეზიდენტმა შეიძინა.
ამერიკელმა რეპერმა კალიფორნიის შტატში, Holmby Hills-ში მდებარე სახლი გასაყიდად 2024 წლის სექტემბერში განათავსა. ჩანაწერების თანახმად, 2025 წლის 24 დეკემბერს სახლი გაყიდვიდან მოხსნეს, თუმცა უცნობია, თუ რა გახდა ამის მიზეზი.
ვიდეოში ნათქვამია, რომ სწორედ ამ სახლს იყენებდა P.diddy ე.წ. "Freak off" წვეულებებისთვის, თუმცა როგორც ამერიკული მედია წერს, Diddy-ის ყოფილი პარტნიორის კესი ვენტურას ჩვენების თანახმად, Diddy "Freak off" წვეულებებს ამ სახლში არ მართავდა.
შესაბამისად, ინტერნეტსივრცეში არ იძებნება ინფორმაცია, რაც დაადასტურებდა, რომ P.Diddy-მ სახლი ნამდვილად გაყიდა, და რომ ეს სახლი ზელენსკიმ შეიძინა.
გავრცელებულ მტკიცებას უკრაინის დეზინფორმაციის წინააღმდეგ ბრძოლის ცენტრი გამოეხმაურა და X-ზე დაწერა, რომ გავრცელებული ინფორმაცია სიმართლეს არ შეესაბამება.
ცნობისთვის, 2024 წლის 16 სექტემბერს ნიუ-იორკის ერთ-ერთ სასტუმროში ცნობილი მილიარდერი რეპერი და მუსიკალური პროდიუსერი შონ კომბსი, იგივე Diddy სამი ბრალდებით დააპატიმრეს: რეკეტი, სექსუალური ტრეფიკინგი იძულებით, ძალით ან მოტყუებით, ტრანსპორტირება პროსტიტუციის მიზნით. საბრალდებო დასკვნის მიხედვით, Diddy აწყობდა წვეულებებს სახელწოდებით Freak Off-ს (ნარკოტიკების ზემოქმედების ქვეშ მყოფი ადამიანების არაკონსესუალური სქესობრივი აქტები). ბრალდების თანახმად, ბრალდებული და მისი პარტნიორები, სავარაუდოდ, ტყუილითა და მუქარით აუპატიურებდნენ ქალებს, რომლებიც, ასევე იძულებით, ნარკოტიკული ზემოქმედების ქვეშ იმყოფებოდნენ. 2025 წლის ოქტომბერში Diddy-ის პროსტიტუციის ბრალდებებთან დაკავშირებულ საქმეში 50-თვიანი პატიმრობა მიესაჯა.
საგულისხმოა, რომ 2022 წლის 24 თებერვლის შემდეგ, რაც რუსეთი თავს დაესხა უკრაინას, რუსული პროპაგანდა უკრაინის პრეზიდენტის დისკრედიტაციის მიზნით აქტიურად ავრცელებს მსგავსი შინაარსის მტკიცებებსა და დეზინფორმაციას. ასეთი შემთხვევები „ჯეოფაქტსს“ წარსულშიც გადაუმოწმებია. მაგალითად, 2024-2025 წლებში ვრცელდებოდა მტკიცება, თითქოს უკრაინის პრეზიდენტმა ლონდონში 20 მლნ დოლარად სასახლე შეიძინა. 2024 წელს ასევე გავრცელდა დეზინფორმაცია, რომლის თანახმადაც ვოლოდიმირ ზელენსკიმ სტინგისგან იტალიაში ღვინის მამული იყიდა. 2024 წელს რუსული ანგარიშები წერდნენ, რომ ზელენსკიმ საფრანგეთში 5-ვარსკვლავიანი სასტუმრო შეიძინა. ყველა ეს მტკიცება ყალბი აღმოჩნდა.
