სოციალურ ქსელში თინა ბოკუჩავას ბრიფინგიდან რედაქტირებული ვიდეო ვრცელდება
სოციალურ ქსელში Facebook-მომხმარებელი ავრცელებს ვიდეოს (დაარქივებული ბმული), რომელშიც თინა ბოკუჩავას ბრიფინგიდან ვხედავთ მონაკვეთს. ვიდეოში თინა ბოკუჩავა ამბობს: „მინდა მივმართო პრეზიდენტ სააკაშვილს. მიშა, ამ ბრძოლაში შენი, თითოეული პოლიტპატიმრის და საქართველოს თავისუფლებისთვის ერთიანი ნაციონალური მოძრაობა ვართ და ვიქნებით ისეთი ერთიანი, როგორც არასდროს და ჩირაღდნად გვექნება შენი [უცენზურო სიტყვის გადასაფარად გამოყენებული აუდიო]“. სინამდვილეში, ვიდეო რედაქტირებულია და თინა ბოკუჩავა ბრიფინგის ამ მონაკვეთში უხამს სიტყვას არ ამბობს.
რეალურად, 17 მარტს გამართულ ბრიფინგზე თინა ბოკუჩავა გამოსვლას შემდეგი სიტყვებით ასრულებს (2:05): „და ბოლოს, მინდა მივმართო პრეზიდენტ სააკაშვილს. მიშა, ამ ბრძოლაში შენი, თითოეული პოლიტპატიმრის და საქართველოს თავისუფლებისთვის ერთიანი ნაციონალური მოძრაობა ვართ და ვიქნებით ისეთი ერთიანი, როგორც არასდროს და ჩირაღდნად გვექნება შენი დღევანდელი სიტყვები: ვიბრძვით და ვიმარჯვებთ, ეს არის ერთადერთი გზა. დიდება თავისუფლებას! დიდება საქართველოს! თავისუფლება მიშას და ყველა პოლიტპატიმარს!“
ამრიგად, Facebook-მომხმარებლის მიერ გავრცელებული ვიდეო რედაქტირებულია.
