სოციალურ ქსელში სალომე ზურაბიშვილის სცენაზე ასვლასთან დაკავშირებით მცდარი ინფორმაცია ვრცელდება
სოციალურ ქსელში Facebook-მომხმარებელი ავრცელებს პოსტს (დაარქივებული ბმული), რომელიც პრეზიდენტ სალომე ზურაბიშვილის 22 დეკემბერს ორბელიანის მოედანზე „საახალწლო სოფელში“ სცენაზე გამოსვლას მიემართება. პოსტში ავტორი წერს: „[პრეზიდენტი] საახალწლო სოფელში განთავსებულ სცენაზე ავარდა, სადაც, ბავშვებისთვის წარმოდგენები იმართებოდა!“. რეალურად, კადრებში არ დასტურდება, რომ პრეზიდენტის სცენაზე ასვლის მომენტში, ბავშვებისთვის წარმოდგენები იმართებოდა.
„ქართული ოცნების“ განცხადებას, რომ 2028 წლის ბოლომდე ევროკავშირთან მოლაპარაკებების გახსნის საკითხს დღის წესრიგში არ დააყენებენ, ქვეყანაში უწყვეტი საპროტესტო აქციები მოჰყვა. პროტესტის ფარგლებში პროფესიული თუ სხვა ნიშნით გაერთიანებულმა ჯგუფებმა არაერთი მსვლელობა და მარში მოაწყვეს. 22 დეკემბერს, პროტესტის 25-ე დღეს, 18:00 საათზე „კახელებისა და ქიზიყელების მარში“ გაიმართა. ტელეკომპანია „ფორმულას“ პირდაპირ ეთერში ჟურნალისტმა განაცხადა, რომ „კახელების მარში“ ერეკლე II-ის მოედანზე შეიკრიბა, 19:14:37 წუთზე კი ჟურნალისტის თქმით, მარშის მონაწილეებმა პარლამენტთან საპროტესტო აქციასთან შეერთებამდე, სალომე ზურაბიშვილის საპრეზიდენტო რეზიდენციასთან მისვლა გადაწყვიტეს. პრეზიდენტი ზურაბიშვილი მარშის მონაწილეებს შეუერთდა და მათთვის მისამართად ორბელიანის მოედანზე „საახალწლო სოფლის“ ღონისძიებების ფარგლებში აწყობილ სცენაზე ავიდა.
წყარო: მედია „აპრილი“
Facebook-მომხმარებელი ამ მომენტზე აცხადებს, რომ სალომე ზურაბიშვილი იმ სცენაზე ავიდა, რომელზეც ბავშვებისთვის წარმოდგენები იმართებოდა. სინამდვილეში, ტელეკომპანია „ფორმულასა“ და „მთავარი არხის“ პირდაპირ ეთერებში ჩანს, რომ სალომე ზურაბიშვილის სცენაზე ასვლის მომენტში სცენა თავისუფალია და იქ საბავშვო წარმოდგენა არ მიმდინარეობს.
დამატებით, „ფორმულას“ ეთერში 19:17:50 წუთზე კადრში ისმის პრეზიდენტ ზურაბიშვილის პირადი დაცვის ხმა. მან მერიის თანამშრომელს, რომელიც სცენის უსაფრთხოებას უზრუნველყოფდა, შეკითხვა დაუსვა, მოსული იყო თუ არა ბენდი. მისი უარის შემდეგ კი (კადრში ჩანს, რომ თანამშრომელი თავის მოძრაობით მიანიშნებს უარზე) პირადი დაცვა პრეზიდენტს უდასტურებს, რომ ბენდი არ მოსულა. ამის შემდეგ სალომე ზურაბიშვილი სცენაზე ადის (19:19:39 წუთზე ვხედავთ მას სცენაზე). ამავე ეთერში 19:21:40 წუთზე ვხედავთ, რომ სალომე ზურაბიშვილი მარშის მონაწილეებს მადლობას უხდის და სცენიდან ჩამოდის. შესაბამისად, პრეზიდენტი სცენაზე დაახლოებით 2 წუთის განმავლობაში იმყოფებოდა.
ამდენად, პირდაპირი ეთერით დასტურდება, რომ პრეზიდენტ ზურაბიშვილის სცენაზე ასვლისას, საბავშვო წარმოდგენა არ მიმდინარეობდა და სოციალურ ქსელში გავრცელებული მტკიცება მცდარია.
