მეურვეობის უკანონო წართმევა თუ ბავშვის უფლებების დაცვა? სოციალურ ქსელში მანიპულაციური ინფორმაცია ვრცელდება
მოკლედ საკითხავი
- ქართულ ფეისბუქ სივრცეში გავრცელებული მტკიცების მიხედვით, აშშ-ის მასაჩუსეტსის შტატში კათოლიკე ცოლ-ქმარს შვილი იმის გამო ჩამოერთვათ, რომ მათ თავიანთი შვილის ტრანსგენდერული იდენტობის აღიარებაზე უარი თქვეს.
- საკითხის შესწავლა გვიჩვენებს, რომ მასაჩუსეტსის შტატის შესაბამისმა უწყებებმა არასრულწლოვნის გარიდების გადაწყვეტილება მასზე ფიზიკური ძალადობის ბრალდების შემდეგ მიიღეს.
ქართულ ფეისბუქ სივრცეში გავრცელდა პოსტი, რომელიც წარმოადგენს The Washington Stand-ის სტატიის თარგმანს (დაარქივებული ბმული). პოსტში აღწერილია აშშ-ში მიმდინარე სამართლებრივი დაპირისპირება კათოლიკე ოჯახსა და მასაჩუსეტსის შტატის ადგილობრივ ხელისუფლებას შორის, რომელიც ეხება აღნიშნული ოჯახის მეურვეობას მათ შვილზე. პოსტის მტკიცებით, მშობლებს შვილი მას შემდეგ ჩამოართვეს, რაც მათ უარი თქვეს მისი ტრანსგენდერული იდენტობის აღიარებაზე.
გავრცელებული პოსტი საკმაოდ ვრცელია, რადგან წარმოადგენს ასევე საკმაოდ ვრცელი სტატიის თარგმანს. The Washington Stand-ი, რომლის სტატიაც აქვს გამოყენებული პოსტის ავტორს და რომლის ბმულსაც ის პოსტის კომენტარში უთითებს კიდეც, ამ მედიასაშუალებისვე აღწერით წარმოადგენს "„Family Research Council“-ის პლატფორმას, რომელიც ბიბლიურ მსოფლმხედველობაზე დაფუძნებულ სიახლეებსა და კომენტარებს აქვეყნებს." Family Research Council (ოჯახის კვლევის საბჭო), საკუთარ თავს ახასიათებს როგორც "არაკომერციულ კვლევით და საგანმანათლებლო ორგანიზაციას, რომელიც ეძღვნება საზოგადოებრივი ცხოვრების ოჯახზე ორიენტირებული ფილოსოფიის ჩამოყალიბებასა და განვითარებას."
ეს საკითხი ფართოდ გაშუქდა სხვადასხვა მედია საშუალების მიერ, მათ შორის ავტორიტეტული ამერიკული მედია ორგანიზაციების მიერაც. უნდა აღინიშნოს, რომ The Washington Stand-ის სტატიაში, რომლის თარგმანიც გავრცელდა ქართულ ფეისბუქ სივრცეში, ამბავი მხოლოდ ერთი მხრიდან, კუცკოების ოჯახის და მათი მხარდამჭერების მხრიდან არის გადმოცემული. სტატიაში გვხვდება კომენტარები სხვადასხვა კონსერვატიული ჯგუფებისგან და სპიკერებისგან, რომლებიც მასაჩუსესტსის შტატის სტრუქტურების ქმედებებს გმობენ და ოჯახს მხარდაჭერას აღუთქვამენ. არ გვხვდება კომენტარები თავად შტატის ოფიციალური უწყებების წარმომადგენლებისგან.
უფრო დაბალანსებულია ინფორმაცია, რომელსაც ამ თემაზე CBS News, Boston Herald და New York Post-ი გვაწვდიან. მათ სტატიებში, ოჯახის და მათი ადვოკატის პოზიციების გარდა ასევე გვხვდება საპირისპირო მხარის პოზიციაც. მაგალითად, მასაჩუსეტსის შტატის გუბერნატორის, მორა ჰილის (Maura Healey) კომენტარის მიხედვით, მისი შტატის ბავშვებისა და ოჯახების დეპარტამენტმა (Department of Children and Families) კუცკოების ოჯახს შვილი მას შემდეგ განარიდა, რაც მშობლების წინააღმდეგ სისხლის სამართლის საქმის წარმოება დაიწყო შვილზე ძალადობის ბრალდებით.
CBS News-ის მიხედვით, 2026 წლის 17 სექტემბრის მდგომარეობით ჯოზეფ კუცკოს სასამართლოს მიერ პრობაციის პერიოდი ჰქონდა განსაზღვრული და მის წინააღმდეგ სისხლის სამართლის საქმე შეწყდება დეკემბერში, თუ ის პრობაციის პირობებს არ დაარღვევს. Boston Herald-ის მიერ მოპოვებული სასამართლო დოკუმენტაციის მიხედვით, შვილმა, სოფი კუცკომ, მამა, ჯოზეფი დაადანაშაულა ცემაში, თმით თრევასა და მოკვლით დამუქრებაში.
მას შემდეგ რაც საკითხის შესახებ ინფორმაცია ფართოდ გავრცელდა, განვითარებულ მოვლენებში ჩაერთო აშშ-ის ფედერალური ხელისუფლების სხვადასხვა სტრუქტურაც. ამ ეტაპზე, სამართლებრივი დავა ოჯახსა და მასაჩუსეტსის შტატს შორის კვლავაც გრძელდება.
შესაბამისად, ქართულ მედიასივრცეში ინფორმაცია არასრული კონტექსტით ვრცელდება. არასრულწლოვნის ოჯახისგან წაყვანის გადაწყვეტილება სახელმწიფო უწყებებმა მიიღეს ძალადობის სავარაუდო ფაქტის გამოვლენის შემდეგ და არა მშობლების მხრიდან გენდერული იდენტობისა თუ სექსუალური ორიენტაციის მიუღებლობის გამო.
