სოციალურ ქსელში მსახიობ ბაჩი ვალიშვილის ინტერვიუს ფრანგმენტი კონტექსტის გარეშე ვრცელდება
სოციალურ ქსელში მსახიობ ბაჩი ვალიშვილის ინტერვიუს ფრაგმენტი ვრცელდება, სადაც ის ამბობს: "არაფრის იმედი არ მაქვს, მართლა. ანუ აბსოლუტურად საზო წარკვეთილი ვარ და აბსოლუტურად განცდა მაქვს რომ დაღუპულები ვართ და მორჩა ყველაფერი. დავიხურეთ ქუდი და ტიტრები ამოვუშვით" (არქივირებული ბმული). პოსტს თან ახლავს აღწერა "გულწრფელი აკაცუკი". საბოლოო ჯამში, პოსტი ქმნის შთაბეჭდილებას, თითქოს მსახიობი ხელისუფლების წინააღმდეგ ბრძოლაში დამარცხებას აღიარებს და პროტესტს წყვეტს.
აღნიშნული მონაკვეთი ტვ პირველის 2026 წლის 24 ივლისის ეთერიდანაა ამოჭრილი (არქივი). სრულ ინტერვიუში მსახიობის ციტატა განსხვავებულ კონტექსტშია ნათქვამი, ის აცხადებს, რომ მსგავსი სასოწარკვეთილი განწყობა ხელისუფლებას აწყობს და ის ამის საპირისპიროდ ცდილობს, რომ კვლავ აქტიურად იყოს პროტესტში ჩართული (52 წუთიდან): "ჩემი გასაღები ამ ყველაფერთან ინდივიდუალურ დონეზე, ეხლა მე მე ვერ დავამარცხებ 200 წლიან ინსტიტუციური მეხსიერების მქონე კგბ-ებს ერთი ადამიანი. ხო მე არ ვარ, სამწუხარედ, მაგრამ ჩემ თავს შემიძლია ესეთი რაღაცის გაკეთება და ძაან მაგრა მუშაობს. ეგ მუშაობს, მათ შორის მოძალადეებთანაც წყვილებში, ეგ მუშაობს როცა მანიპულატორთან გაქვს ურთიერთობა ორი რაღაცა არის: ერთი არის ის, როცა ადამიანს უნდა რომ შენში ემოცია გამოიწვიოს და შენ ნეიტრალური რჩები, ანუ არც ნეგატიურ არც პოზიტიურ ემოციას არ გამოხატავ. მეორე არის რაც შეუძლებელი არის ეხლა ამ პირობებში, მაგრამ მეორე რასაც მე მივაგენი არის შემდეგი: პირველ რიგში, კითხვას სვამ, რა უნდა ახლა ჩემ მტერს. ჩემ მტერს თუ უნდა რომ მე გეჩხუბოთ თქვენ, ქალბატონო ნინო, მე თქვენ არავითარ შემთხვევაში, სულ რომ დედა მაგინოთ, მე თქვენ არ გეჩხუბებით. თუ ჩემს მტერს უნდა რომ არ გავიდე რუსთაველზე, მე გავალ რუსთაველზე. მე ძალიან გულწრფელად ვიტყვი და ბევრი არის ჩემნაირად, მე არაფრის იმედი არ მაქვს, მართლა. ანუ აბსოლუტურად საზო წარკვეთილი ვარ და აბსოლუტურად განცდა მაქვს რომ დაღუპულები ვართ და მორჩა ყველაფერი. დავიხურეთ ქუდი და ტიტრები ამოვუშვით. მაგრამ ვიცი, რომ ამას რომ ვგრძნობ, ეს არ არის ჩემი გულწრფელი ემოციები. ეს რაღაცით არის განპირობებული. ჯერ რომ ვერ ვპოულობ ხელჩასაჭის და პროპაგანდას ჩემ თავშივე რომ ვერ ვერევი ლოგიკით, უბრალოდ პრინციპს ვიღებ, რომ რახან მტერს უნდა რომ მე ამ შეგძნებამ სახლში დამტოვოს, მე ავდგები და ჩემი წინააღმდეგობა იქნება, რომ რაც მტერს უნდა იმის საპირისპიროს გავაკეთებ".
ამდენად, სოციალურ ქსელში გავრცელებული მონაკვეთი მცდარ შთაბეჭდილებას ქმნის, თითქოს მსახიობი პროტესტში მონაწილეობას წყვეტს. სრულ ინტერვიუში ჩანს, რომ მსახიობის თქმით, უიმედობის განცდა პროპაგანდის მიერ გამოწვეული შეგრძნებაა, რომელსაც ის სწორედ პროტესტში აქტიური მონაწილეობით და არა გაჩერებით ებრძვის.
