ტყუილია, რომ ესტონეთის დაზვერვამ დაადასტურა ზელენსკის ნარკოტიკების მოხმარება
მოკლედ საკითხავი
სოციალურ ქსელში გავრცელდა მტკიცება, თითქოს ესტონეთის დაზვერვამ დაადასტურა, რომ უკრაინის პრეზიდენტი ვოლოდიმირ ზელენსკი ნარკოტიკს მოიხმარს;
სინამდვილეში, ინფორმაციის პირველწყარო რუსული სატირული გვერდია;
ესტონეთის დაზვერვას მსგავსი ინფორმაცია არ გამოუქვეყნებია.
სოციალურ ქსელში გავრცელებული ინფორმაციის თანახმად, ესტონური დაზვერვის ცნობით, ზელენსკი კოკაინს მოიხმარს (არქივირებული ბმული).
ესტონეთის საგარეო დაზღვერვას უკანასკნელ დღეებში ინფორმაცია ზელენსკის შესახებ არ გამოუქვეყნებია. აღნიშნულმა უწყებამ წლიური ანგარიში 2026 წლის თებერვალში გამოაქვეყნა, სადაც უკრაინა 56-ჯერ არის ნახსენები, ზელენსკი კი - 0-ჯერ. საგარეო დაზვერვა უკრაინას რუსეთის სრულმასშტაბიანი ომის და ევროპული უსაფრთხოების კონტექსტში განიხილავს. არც ერთ შემთხვევაში უკრაინის ხელმძღვანელობის მხრიდან ნარკოტიკების მოხმარებაზე საუბარი არ არის.
დამატებით, "ჯეოფაქტსმა" ასევე მოიკვლია ესტონეთის შიდა უსაფრთხოების სამსახურის ვებგვერდი. უწყებამ წლიური ანგარიში აპრილში გამოაქვეყნა. მასში ერთხელაა ნახსენები უკრაინის პრეზიდენტი ვოლოდიმირ ზელენსკი, თუმცა სულ სხვა კონტექსტში. უწყების თანახმად, მათ უკრაინის მოქალაქეს ესტონეთში ცხოვრების უფლება გაუუქმეს, რადგან ის რუსეთის FSB-სთან თანამშრომლობდა. აღნიშნული პიროვნების შესახებ უწყება წერს, რომ მას კომუნიკაცია ჰქონდა FSB-ს ოფიცერთან, მაქსიმ მიშუსტინთან, რომელიც, თავის მხრივ, უკრაინის უსაფრთხოების სამსახურმა გამოააშკარავა 2024 წელს და რომელიც უკრაინელი მაღალჩინოსნების, მათ შორის, პრეზიდენტ ზელენსკის, მკვლელობის ოპერაციას გეგმავდა.
ქართულ სოციალურ ქსელში გავრცელებული მტკიცების რუსულ ენაზე ძიებით დგინდება, რომ სინამდვილეში გავრცელებული ამბის პირველწყარო სოციალურ ქსელ VK-ზე არსებული სატირული რუსულენოვანი გვერდია (არქივი).
აღსანიშნავია, რომ მტკიცება ზელენსკის ნარკოდამოკიდებულებასთან დაკავშირებით 2022 წელს რუსეთის უკრაინაში შეჭრის შემდეგ აქტიურად ვრცელდება. მტკიცებები ძირითადად რედაქტირებულ ფოტო/ვიდეო მასალას ეფუძნებოდა და სხვადასხვა ფაქტების გადამმოწმებელ ორგანიზაციას, მათ შორის "ჯეოფაქტსს", მრავალჯერ გადაუმოწმებია (1; 2; 3).
