ჯულიან ასანჟის ციტატა ისრაელის შესახებ გამოგონილია
ირანის წინააღმდეგ ისრაელის და აშშ-ის ერთობლივი სამხედრო ოპერაციის პარალელურად, სოციალურ მედიაში ქართულენოვანმა ანონიმურმა გვერდებმა გაავრცელეს Wikileaks-ის დამფუძნებლის, ჯულიან ასანჟის ციტატა - "დაივიწყეთ რუსეთი, რეალური საფრთხე რაც მსოფლიოს ემუქრება, ისრაელიდან მოდის" (არქივირებული ბმული).
არ დასტურდება, რომ ჯულიან ასანჟს მსგავსი განცხადება გაკეთებული აქვს, ციტატა კი 2016 წლიდან არასანდო გვერდების და ანგარიშების მიერ ვრცელდება.
ყალბი ციტატის 2026 წლის მარტში გავრცელებული ვარიანტი დამატებით არის გაყალბებული. აშკარა არის, რომ სიტყვა "მსოფლიო" (The World) სხვა სიტყვაზე არის გადაწერილი. მსგავსი პოსტები სწორედ ირანის წინააღმდეგ აშშ-ისრაელის ერთიანი სამხედრო ოპერაციის დროს შეიქმნა და გავრცელდა. აქამდე, ციტატაში ნახსენები იყო არა "მსოფლიო", არამედ "ამერიკა".
მოცემული სურათი და ციტატა მსგავსი ფორმით 2023 წლის ოქტომბერში გავრცელდა, მას შემდეგ რაც ტერორისტული ორგანიზაცია ჰამასის მიერ ისრაელში განხორციელებულ ტერაქტს, რომელსაც 1195 ადამიანის სიცოცხლე შეეწირა, ღაზას სექტორში ისრაელის რეაქცია მოჰყვა.
პოსტის ავტორებს ციტატის წყაროდ სხვადასხვა ვებგვერდები მოჰყავდათ, მათ შორის ჩეხეთში პალესტინის საელჩო. მოცემულ ვებგვერდებზე ციტატა 2017 წელს გამოქვეყნდა და თითოეული მათგანი ერთიდაიგივე წყაროს ეფუძნება - AWDnews.com - რომელმაც ჯულიან ასანჟთან ყალბი ინტერვიუ 2016 წელს გამოაქვეყნა.
AWDnews.com ყალბი ინტერვიუს ძველი ფოტოანაბეჭდი
AWDnews.com აღარ ფუნქციონირებს, რადგან 2020 წელის აშშ-ის იუსტიციის დეპარტამენტმა FARA-ის (უცხოური აგენტების რეგისტრაციის აქტი) საფუძველზე ის გააუქმა, ვინაიდან ის ირანის ისლამური რევოლუციის გუშაგთა კორპუსის მიერ იმართებოდა. აშშ-ის იუსტიციის დეპარტამენტის მიხედვით, ვებგვერდი უკანონო ქმედებებით და პროპაგანდის გავრცელებით გავლენის მოხდენის საშუალებად გამოიყენებოდა და ხშირად ავრცელებდა ყალბ ამბებს.
ამდენად, ჯულიან ასანჟის ყალბი ციტატის პირველწყარო ირანის ისლამური რევოლუციის გუშაგთა კორპუსის მიერ მართული ძველი ვებგვერდი არის და მისი ნამდვილობა არ დასტურდება.
