აუდიოჩანაწერი, რომელშიც დონალდ ტრამპი უმცროსი ამბობს, რომ „აშშ-ს იარაღი რუსეთისთვის უნდა გაეგზავნა“, AI-ის მიერ არის გენერირებული

სოციალურ ქსელში Facebook-ანგარიშები (1, 2 ) პოსტებს ავრცელებენ და დონალდ ტრამპ უმცროსს შემდეგ განცხადებას მიაწერენ: „ვერ წარმომიდგენია რომ ვინმე ჭკუათმყოფელს აერჩია უკრაინა მოკავშირედ, როდესაც მეორე არჩევანი რუსეთია- გულწრფელად რომ ვთქვათ, აშშ-ს იარაღი რუსეთისთვის უნდა გაეგზავნა“. რეალურად, ჩანაწერი, რომელშიც დონალდ ტრამპი უმცროსი აღნიშნული განცხადებას აკეთებს, ხელოვნური ინტელექტის მიერ არის გენერირებული.

აღნიშნული ციტატა სოციალურ ქსელში  ტელეკომპანია „იმედმაც“ გაავრცელა, თუმცა მოგვიანებით პოსტი წაშალა და სტატია გამოაქვეყნა, რომელშიც აღნიშნულია, რომ აუდიოჩანაწერი ხელოვნური ინტელექტის მიერ არის გენერირებული. მოგვიანებით, ტელეკომპანია „იმედის“ ქარდი Facebook-ანგარიშების მიერ გავრცელდა.

ამ ეტაპზე, აუდიოჩანაწერის  პირველწყაროდ რუსული ტელეგრამ არხი „Военный обозреватель“ გვხვდება, რომელმაც ჩანაწერი 26 თებერვალს თბილისის დროით 18:52 სთ-ზე გამოაქვეყნა. ანგარიშს 210 ათასზე მეტი გამომწერი ჰყავს. აუდიოჩანაწერი  რუსული სამთავრობო მედიების მიერაც გავრცელდა (1, 2).

პირველ რიგში, ანგარიშების მიერ გავრცელებულ ვიდეოში ჩანს პოდკასტის „Triggered With Don Jr“ ფოტოანაბეჭდი, მითითებულია მონაკვეთის სათაური „FBI Dream Team, Plus Taking Your Questions Live!| Triggered ep. 219”,  ასევე თარიღიც 25 თებერვალი. გადამოწმების შემდეგ ირკვევა, რომ Spotify-ზე აღნიშნული პოდკასტის ოფიციალურ არხზე, 219-ე ეპიზოდი ჯერჯერობით არ გამოქვეყნებულა.  ბოლო 218-ე ეპიზოდი სახელწოდებით „Bye Mitch, plus Kash confirmed, Interview with AJ Rice | Triggered Ep.218” 21 თებერვლით თარიღდება (იხილეთ ფოტო).

გავრცელებულ აუდიოჩანაწერს აშშ-ის პრეზიდენტის შვილის პრესმდივანი გამოეხმაურა. ენდრიუ სურაბიანის თქმით, აუდიოჩანაწერი ხელოვნური ინტელექტის მიერ არის გენერირებული: „ეს არის 100% ყალბი ხელოვნური ინტელექტის გენერირებული აუდიო, მაგრამ დარწმუნებული ვარ, რომ ეს არ შეაჩერებს ტრამპის მოწინააღმდეგე ანგარიშებს, გააგრძელონ მისი არაკეთილსინდისიერი გავრცელება“.

აღსანიშნავია ისიც, რომ ჰანი ფარიდმა, Get Real Labs-ის მთავარმა სამეცნიერო ოფიცერმა და ექსპერტმა,  ABC News-ს განუცხადა, რომ ჩანაწერი სავარაუდოდ ხელოვნური ინტელექტის მიერ იყო შექმნილი. ფარიდმა თქვა, რომ შეფასება ეფუძნება ორი Get Real Labs მოდელის შედეგებს, რომლებიც ხელოვნური ინტელექტის მიერ გენერირებული აუდიოს გამოსავლენად გამოიყენება.

ვიდეოს გამოეხმაურა BBC Verify-ს ჟურნალისტი შაიან შარდარიზადეც, რომელმაც თავის X ანგარიშზე აღნიშნა, რომ აუდიოჩანაწერი ხელოვნური ინტელექტის მიერ არის შექმნილი.

ამდენად, სოციალურ ქსელებში გავრცელებული ციტატა, რომელსაც  დონალდ ტრამპ უმცროსს მიაწერენ, ყალბია და ხელოვნური ინტელექტის მიერ გენერირებული აუდიოჩანაწერიდან არის ამოღებული.