სატანისტური პარკი ოსლოში თუ ნორვეგიელი ხელოვანის არასტანდარტული შემოქმედება?

მოკლედ საკითხავი

სოციალურ ქსელში ვრცელდება ვიდეო, რომლის გამავრცელებლის მტკიცებითაც, იგი ასახავს სატანისტურ მოტივებს.

პარკი ნორვეგიელი მოქანდაკის, გუსტავ ვიგლანდის შემოქედების ღია მუზეუმია.

არაფერი ადასტურებს, რომ გუსტავ ვიგლანდის შემოქმედება სატანისადმი თაყვანისცემის იდეებით იყო შთაგონებული.

ქართულ ფეისბუქ სივრცეში გავრცელდა ვიდეო, რომელიც წინააღმდეგობრივი ქანდაკებებით სავსე პარკს ასახავს (დაარქივებული ბმული). ვიდეოს გამავრცელებლის, ისევე როგორც თავად ვიდეოზე დადებული რუსული ტექსტის მტკიცებით, ქანდაკებები ნორვეგიელთა სატანურ იდეებს უკავშირდება.

გავრცელებული ვიდეო ოსლოში მდებარე ვიგლანდის პარკს ასახავს, რომელშიც ერთ-ერთი ყველაზე ცნობილი ნორვეგიელი მოქანდაკის, გუსტავ ვიგლანდის შემოქმედება ღია ცისქვეშაა გამოფენილი. პარკთან ასევე მდებარეობს ვიგლანდის მუზეუმი, სადაც შედარებით უფრო მცირე ზომის ნამუშევრებია წარმოდგენილი.

უდავოა, რომ ვიგლანდის პარკში არსებული ქანდაკებების ნაწილი დამთვალიერებლის მიერ ექსცენტრიულად და უცნაურადაც კი შეიძლება იყოს აღქმული. მიუხედავად ამისა, ასევე საკმაოდ ცხადია, რომ ქანდაკებების შემქმნელ ხელოვანს თითოეული ნამუშევრის მიმართ თავისი ხედვა ჰქონდა.

პარკში არსებული ცენტრალური ნიმუში, რომელსაც "მონოლითი" ეწოდება და ქართულ ფეისბუქ სივრცეში გავრცელებულ ვიდეოშიც არის ნაჩვენები, წარმოადგენს 17 მეტრის სიმაღლის სვეტს, რომელიც 121 ადამიანის ფიგურას მოიცავს. სვეტში სხვადასხვა ასაკის ქალების და მამაკაცების ფიგურებია გაერთიანებული, ხოლო წვერში კი ბავშვების ფიგურებიც გვხვდება. ვიგლანდის პარკის ვებსაიტზე არსებული განმარტებით, "მონოლითი" აღიქმება როგორც ერთგვარი აღდგომის სიმბოლო, რომელიც ადამიანების სურვილსა და სწრაფვას ასახავს სულიერებისკენ. ვებსაიტზე ასევე ციტირებულია თავად ავტორის სიტყვები: "ეს სვეტი ჩემი რელიგიაა".

არაფერი მიუთითებს იმაზე, რომ გუსტავ ვიგლანდი რაიმე სახით დაკავშირებული იყო სატანის განდიდებასთან. ზოგიერთი წყარო გვეუბნება, რომ ის ბავშვობიდან გატაცებული იყო რელიგიით, სულიერებით, ქანდაკებებითა და ხის მასალაზე მუშაობით.

აქვე უნდა აღინიშნოს, რომ ვიგლანდის პარკში განთავსებული უამრავი ნამუშევრიდან, ქართულ ფეისბუქ სივრცეში გავრცელებულ ვიდეოში ნიმუშებად აღებულია ყველაზე ექსცენტრიული და უცნაური მაგალითები, რამაც კონკრეტული რელიგიისა და მსოფლმხედველობის ადამიანებში შეიძლება სატანურ იდეებთან ასოციაცია გამოიწვიოს.

ვიდეოში არაა წარმოდგენილი პარკში არსებული უამრავი სხვა ქანდაკების მაგალითი, რომლებიც ბევრად უფრო ბუნებრივად გამოიყურებიან და რომელთა უკან მდგომი იდეების სატანის თაყვანისცემასთან დაკავშირება საკმაოდ რთული იქნებოდა. ვიგლანდი პარკის ვებსაიტის ან ღია წყაროებში არსებული ფოტოების დათვალიერება ბევრი მსგავსი ქანდაკების ნახვის საშუალებას იძლევა.

დასასრულს უნდა ითქვას, რომ როგორც სხვა ნებისმიერი სახის ხელოვნებაში, ქანდაკებების შემთხვევაშიც აღქმები ყოველთვის სუბიექტურია და უფრო ხშირად ასახავს მაყურებლის მსოფლმხედველობასა და ღირებულებებს, ვიდრე ხელოვნების ნიმუშის ობიექტურ მნიშვნელობას. ეს მარტივად დადასტურებადია ვიგლანდის ქანდაკებების მნიშვნელობის შესახებ ღია წყაროებში ძიებით.

გუსტავ ვიგლანდს თავისი ნამუშევრების დეტალური ინტერპრეტაციები არ დაუტოვებია, რაც დამთვალიერებელს ფართო გზას უხსნის მის ნამუშევრებს საკუთარი თვალით შეხედოს და მათზე თავისი აზრები თავისუფლად ჩამოაყალიბოს.