რუსული ანგარიშები ირანის მიერ უკრაინელი სამხედროს მოკვლის შესახებ ტყუილს ავრცელებენ

აშშ-ისრაელსა და ირანს შორის მიმდინარე სამხედრო კონფლიქტის პირობებში, უკრაინამ იორდანიაში აშშ-ის სამხედრო ბაზების დასაცავად დრონები და ექსპერტები გაგზავნა. უკრაინელი სამხედრო ექსპერტების ჯგუფები ასევე იმყოფებიან კატარში, არაბთა გაერთიანებულ საემიროებსა და საუდის არაბეთში, სადაც სპარსეთის ყურის ქვეყნებს, რომლებიც ირანის საჰაერო თავდასხმების სამიზნეები არიან, საჰაერო თავდაცვის ექსპერტიზას აწვდიან. აღნიშნულის ფონზე გავრცელდა დეზინფორმაცია, თითქოს უკრაინის შეიარაღებული ძალების წარმომადგენელი ანატოლი ონიშჩუკი, რომელიც მონაწილეობდა მოკავშირეთა სამხედრო პერსონალის უკრაინული დრონების გამოყენებაში წრთვნიდა, ირანულ საჰაერო თავდასხმას ემსხვერპლა.

რეალურად, სურათზე აღბეჭდილი უკრაინელი სამხედრო 2024 წლის 18 ივლისს, დონეცკის რაიონში პაბედას დასახლებასთან საბრძოლო მისიის შესრულებისას 43 წლის ასაკში დაიღუპა. მისი სახელი არა ანატოლი ონიშჩუკი, არამედ მიკოლა სიშჩიკი არის.

დეზინფორმაციის გავრცელების მიზნით, მავნე აქტორებმა დაღუპული მიკოლა სიშჩიკის სახე ხელოვნური ინტელექტის ან სხვა ციფრული საშუალებით დაარედაქტირეს, რათა ყალბი ამბავი უფრო დამაჯერებელი გამხდარიყო.

მარჯვნივ მიკოლა სიშჩიკი, ხოლო მარცხნივ მისი გაყალბებული სურათით შექმნილი ანატოლი ონიშჩუკი

არასწორი ინფორმაცია თავდაპირველად უკრაინულმა Facebook-გვერდმა, Дніпро Оперативний-მ გაავრცელა, მოგვიანებით კი წაშალა. გვერდის მიერ გამოქვეყნებული პოსტის ფოტოანაბეჭდი მალევე ირანულმა და რუსულმა ანგარიშებმა აიტაცეს და სხვადასხვა სოციალური მედიის პლატფორმაზე გაავრცელეს, როგორიც არის ტელეგრამი (1, 2, 3), X (1, 2, 3, 4, 5), და Facebook (1, 2).

რუსულ და ირანულ წყაროებზე დაყრდნობით ქართულ საინფორმაციო სივრცეში პოსტი გაავრცელა ანონიმურმა ანგარიშმა.