სიმართლე არ არის, რომ ამერიკელმა კონგრესმენებმა შეკითხვა "პირველ რიგში ამერიკაა თუ ისრაელი" უკომენტაროდ დატოვეს

მოკლედ საკითხავი

გავრცელებული ვიდეოს აღწერის მიხედვით, ჟურნალისტი ამერიკელ კონგრესმენებს ეკითხება პირველ რიგში ამერიკაა თუ ისრაელი და ისინი ამ კითხვას უკომენტაროდ ტოვებენ.

პიროვნება, რომელიც ვიდეოში კითხვას სვამს ჟურნალისტი არ არის.

ვიდეოში ასახულნი არ არიან ამერიკელი კონგრესმენები.

ვიდეოში ნაჩვენები ადამიანები ერთ-ერთი ამერიკელი კონგრესმენის ოფისის წინ შეხვედრას ელოდებიან.

ქართულ ფეისბუქ სივრცეში გავრცელდა ვიდეო (1; 2) რომლის აღწერის მიხედვითაც: "ჟურნალისტი ამერიკის კონგრესში ამერიკელ კონგრესმენებს ეკითხება: „პირველ რიგში ამერიკაა თუ ისრაელი?“ - თუმცა ყველა დუმილის უფლებას იყენებს." ვიდეოში პიროვნება მართლაც უსვამს მსგავს შეკითხვას ადამიანთა ჯგუფს. შენობა, რომელშიც ისინი იმყოფებიან, სავარაუდოდ, აშშ-ის კონგრესის შენობას წარმოადგენს.

ვიდეოზე დატანილი ინგლისური ტექსტის მიხედვით, მოქმედება აშშ-ის ვირჯინიის შტატის კონგრესმენის, იუჯინ ვინდმანის ოფისის გარეთ ხდება. ტერიტორიაზე ათზე მეტი ადამიანი დგას და სავარაუდოდ, ოფისში შესვლას ელოდებიან.

ცნობილია, რომ კონგრესმენები ხშირად ხვდებიან სხვადასხვა ინტერეს ჯგუფების წარმომადგენლებს, ორგანიზაციებს ან კონგრესის აპარატის თანამშრომლებს. სავარაუდოა, რომ კონგრესმენ იუჯინ ვინდმანის ოფისის გარეთ სწორედ ასეთი შეხვედრის მომლოდინე ადამიანები დგანან. შესაბამისად, არაფერი გვაძლევს საფუძველს ვიფიქროთ, რომ ვიდეოში ასახული ადამიანები ამერიკელი კონგრესმენები არიან.

რაც შეეხება ვიდეოზე დატანილ ლოგოს, იგი შედგება ლათინური ასოებისგან PNN, ხოლო შრიფტით და ფერებით წააგავს ცნობილი ამერიკულ ახალი ამბების ქსელის, CNN-ის ლოგოს. ლოგოს ძიებას მივყავართ ე.წ. პალესტინის სიახლეების ქსელის (Palestine News Network, PNN) სოციალური ქსელების გვერდებამდე. სწორედ აქ ვხვდებით კიდეც ქართულ ფეისბუქ სივრცეში გავრცელებული ვიდეოს ორიგინალ წყაროს.

ვიდეოს გადამღები და კითხვების დამსმელი პიროვნების დამოკიდებულება კითხვების ადრესატებისადმი ნაკლებად დამაჯერებელს ხდის, რომ ეს პიროვნება ჟურნალისტია და რომ ქსელი, რომელსაც ის წარმოადგენს, რაიმე სახის ჟურნალისტურ სტანდარტებს მიჰყვება. აღნიშნული პიროვნება უხეშად ესაუბრება კითხვების ადრესატების ნაწილს, აღნიშნავს რა, რომ მათი აზრი არ აინტერესებს, ხოლო მეორე ნაწილს სიტყვიერად ავიწროებს და დასცინის - მაგალითისთვის ერთ-ერთ პიროვნებას ჯგუფიდან სიმელოტეზე მიუთითებს. PNN-ის პლატფორმებზე სხვა ვიდეოებშიც რესპონდენტებისადმი იმავე ან უარესი ტიპის დამოკიდებულებას ვაწყდებით. ორიგინალ წყაროში არ არის მითითებული, რომ ვიდეოში ნაჩვენები ადამიანები კონგრესის წევრები არიან.

ამერიკის ცილისწამების საწინააღმდეგო ლიგა (Anti-Defamation League) PNN-ს შემდეგნაირად აღწერს: "პალესტინის საინფორმაციო ქსელი (PNN) არის პიროვნებათა ჯგუფი, რომლებიც ავიწროებენ მათთვის უცნობ ხალხს, ხშირად ებრაელებს და ითხოვენ მათგან პოზიციის დაფიქსირებას პალესტინის შესახებ. ჯგუფი ასევე გამოხატავს მხარდაჭერას ისრაელის საწინააღმდეგო ტერორისა და ძალადობის მიმართ." ეს ყველაფერი მიგვითითებს, რომ PNN უფრო მეტად აქტივისტთა ჯგუფია, ვიდრე რაიმე ტიპის მედია საშუალება.

რომ შევაჯამოთ, არ დასტურდება, რომ ვიდეოში ასახული ადამიანები, ვისაც კითხვას უსვამენ, ამერიკელი კონგრესმენები არიან, ხოლო პიროვნება, ვინც სვამს შეკითხვებს, არ არის ჟურნალისტი.