ტყუილია, რომ ტრამპის უმცროსი ვაჟი სამხედრო მობილიზაციისთვის იძებნება

სოციალურ მედიაში გავრცელდა ინფორმაცია, რომ ასი ათასობით ამერიკელმა ხელი მოაწერა პეტიციას, რომელშიც აშშ-ის პრეზიდენტის უმცროსი ვაჟის, ბარონ ტრამპის, მობილიზება და ირანში საბრძოლველად გაგზავნაა მოთხოვნილი. ამასთან, გავრცელებულ პოსტებში ვკითხულობთ, რომ "ტრამპის უმცროსი ვაჟი სამხედრო მობილიზაციისთვის იძებნება", რაც აჩენს არასწორ წარმოდგენას, რომ ბარონ ტრამპი სამხედრო მობილიზაციას ემალება (არქივირებული ბმული).

ირანის წინააღმდეგ აშშ-ისრაელის საერთო სამხედრო ოპერაციის შემდეგ აშშ-ში მართლაც შეიქმნა ვებგვერდი DraftBarronTrump.Com (გაიწვიეთ ბარონ ტრამპი), თუმცა ის სატირული შინაარსის არის და არ წარმოადგენს პეტიციას, შესაბამისად, ტყუილია, რომ "ასი ათასობით ამერიკელმა ხელი მოაწერა პეტიციას", ვინაიდან პეტიცია არ არსებობს.

ვებგვერდი ამერიკული კომედიური ანიმაციის "South Park-ის" ყოფილმა სცენარისტმა, ტობი ნორტონმა შექმნა. მასზე განთავსებულია სატირული ციტატები, რომლებიც თითქოს ტრამპს და მის ოჯახის წევრებს ეკუთვნით.

ნორტონს ტრამპის გასაშარჟებლად სატირული გვერდები აქამდეც შეუქმნია. მაგალითად, მან იყიდა დომენი სახელწოდებით trumpkennedycenter.org, მას შემდეგ რაც კენედის სახელობის საშემსრულებლო ხელოვნების ცენტრის სახელი ტრამპ-კენედის სახელობის ცენტრად გადაკეთდა. ნორტონმა ასევე შექმნა ვებგვერდი ResignChuck.com (გადადექი ჩაკ), რომელიც დემოკრატიული პარტიის ლიდერის, ჩაკ შუმერის გადადგომას მოითხოვს ტრამპის ქმედებების მიმართ მისი სუსტი წინააღმდეგობის გამო.

ბარონის სამხედრო გაწვევის შესახებ სატირული ვებგვერდის შექმნას სოციალურ მედიაში პოსტები მოჰყვა, რომელშიც ტრამპის და ირანში სამხედრო ოპერაციის კრიტიკოსები ბარონ ტრამპის გაწვევას მოითხოვენ, თუმცა პოსტებიც სატირული შინაარსის არის.

ბარონ ტრამპს აშშ-ის სამხედრო ძალებში ვერ გაიწვევენ. აშშ-ში სავალდებულო სამხედო გაწვევა 1973 წლის შემდეგ არ მოქმედებს და სამხედრო ძალებში გაწევრიანება მოხალისეობრივია. ამავდროულად, ბარონის სიმაღლე 2.05 მეტრია, რაც აღემატება აშშ-ის სამხედრო ძალებისთვის დადგენილ მაქსიმალური სიმაღლის სტანდარტს, რომელიც 2.03 მეტრია.

ინფორმაცია, რომ ბარონ ტრამპი იძებნება, ასევე ტყუილია. პრეზიდენტ ტრამპის 19 წლის ვაჟი ნიუ-იორკის უნივერსიტეტის სტუდენტი არის და ძირითადად დროს ქალაქ ნიუ-იორკში ატარებს.