სოციალურ ქსელში ხელოვნური ინტელექტით გენერირებული მორიგი თაღლითური სქემის ვიდეო ვრცელდება
სოციალურ ქსელში Facebook-გვერდი „Health and Care” ავრცელებს ვიდეოს (არქივირებული ბმული), რომელშიც ტელეკომპანია „რუსთავი 2“-ის წამყვანი ნათია ლაზაშვილი დაავადებათა კონტროლის ეროვნული ცენტრის (NCDC-ის) ყოფილი დირექტორის, ამირან გამყრელიძის განცხადებას აჟღერებს: „იდიოტები ხართ, თუ ფიქრობთ, რომ პარაზიტებით არ ხართ დაინფიცირებული“. ჟურნალისტი აგრძელებს: „ამ განცხადების შემდეგ, რომელიც ამირან გამყრელიძემ გააკეთა, ინტერნეტში ნამდვილი სკანდალი ატყდა. ამავე დროს მისი ახალი პროდუქტი გაყიდვების ყველა რეკორდს ხსნის და აფთიაქების შემოსავალს ამცირებს“. ამის შემდეგ, ვიდეოში ამირან გამყრელიძის მიმართვაა ჩასმული: „დიახ, ნამდვილად იდიოტებს ვუწოდებ ყველას, ვინც ჯერ კიდევ არ წმენდს ორგანიზმს პარაზიტებისგან, ან კვლავ ეყრდნობა აბებს 2025 წელს“. სინამდვილეში ვიდეო ნამდვილი არ არის. როგორც წამყვანის, ასევე ამირან გამყრელიძის კადრები ხელოვნური ინტელექტითაა დამუშავებული.
პირველ რიგში, აღსანიშნავია, რომ როგორც ნათია ლაზაშვილის, ასევე ამირან გამყრელიძის ტუჩების მოძრაობა არ ემთხვევა მათ მიერ წარმოთქმულ სიტყვებს. უზუსტობებია აგრეთვე, თავად ტექსტებში და სუბტიტრებში.
ამირან გამყრელიძის ვიდეო, როგორც ჩანს, NCDC Georgia-ს YouTube-გვერდიდან არის აღებული. ვიდეოში დაავადებათა კონტროლის ეროვნული ცენტრის ყოფილი ხელმძღვანელი კოლეგებს ახალ წელს ულოცავს და მათ მადლობას უხდის.
კადრი YouTube-ზე გამოქვეყნებული ვიდეოდან
კადრი რედაქტირებული ვიდეოდან
რედაქტირებული ვიდეო Facebook-ზე გვერდმა, სახელად Health and care განათავსა. გვერდზე გადასვლისას ჩანს, რომ მათ პოსტები გამოქვეყნებული არ აქვთ. Facebook-ის რეკლამების ბიბლიოთეკაში ხელმისაწვდომია გვერდის მიერ გაშვებული Amazon-ის პროდუქციის ბერძნულენოვანი რეკლამები (იხილეთ ფოტო). დარეკლამებული პოსტები მათ გვერდზე (ე.წ. Timeline-ზე) არ გვხვდება.
ხელოვნური ინტელექტის მიერ შექმნილი ვიდეო, სავარაუდოდ, თაღლითური სქემის ნაწილია და „ახალი პროდუქტის“ შესაძენად მომხმარებლების თანხის მითვისებას ცდილობს. ვიდეოს თანდართული აქვს ბმულიც, რომელიც, ამჟამად, აღარ ფუნქციონირებს. სავარაუდოდ, მასზე გადასვლის შემდეგ მომხმარებლებს „ახალი პროდუქტის“ შესახებ ინფორმაცია დახვდებოდათ და მისი შეძენისთვის თავიანთი მონაცემების მითითებასაც შეძლებდნენ. ის, რომ სავარაუდოდ, მოქალაქეების პირადი მონაცემების მოპოვებისთვის გათვლილი თაღლითური სქემაა, მიანიშნებს, გასულ კვირას მსგავსი თაღლითური სქემის ვიდეოს გავრცელებაც. ამ შემთხვევაში მომხმარებლებს ბალანსზე 20 ევროს შეტანას სთხოვდნენ (იხილეთ „ჯეოფაქტსის“ სტატია).
ამგვარად, გავრცელებული ვიდეო ხელოვნური ინტელექტითაა დამუშავებული და ის სავარაუდოდ, თაღლითური სქემის ნაწილია.
