დეზინფორმაცია: ოფიციალური კიევი არ აღიარებს ახალ პაპს, თუ მას უკრაინის მონაწილეობის გარეშე აირჩევენ

სოციალურ ქსელში Facebook-მომხმარებელი ნონა შარაბიძე, რომლის მიერ გავრცელებული დეზინფორმაცია „ჯეოფაქტსს” არაერთხელ გადაუმოწმებია (1; 2; 3), პოსტს ავრცელებს (დაარქივებული ბმული). პოსტის მიხედვით, კიევმა ვატიკანს აცნობა, რომ არ აღიარებს ახალ პაპს, თუ მას უკრაინის მონაწილეობის გარეშე აირჩევენ. პოსტს ახლავს  ზელენსკის რედაქტირებული ფოტო, რომელშიც პრეზიდენტს სასულიერო პირის თეთრი სამოსი აცვია, ფონზე კი ჩანს წმინდა პეტრეს ტაძარი ვატიკანში. რეალურად, აღნიშნული ინფორმაცია სიმართლეს არ შეესაბამება, პრეზიდენტ ზელენსკის ადმინისტრაციას მსგავსი განცხადება არ გაუკეთებია. ამავდროულად, რომის პაპის არჩევა ვატიკანის კარდინალების კოლეგიის მიერ ხდება და მასში სხვა სახელმწიფოები არ მონაწილეობენ. 

აღნიშნული ინფორმაცია თავდაპირველად რუსულენოვანი ანგარიშების მიერ, ყოველგვარი წყარო მითითების გარეშე, გავრცელდა (1, 2, 3). განცხადების შესახებ ინფორმაცია არც ერთ სანდო მედიასა თუ ღია წყაროში არ იძებნება. დამატებით, განცხადებას ვერ ვხვდებით ვერც პრეზიდენტის ადმინისტრაციის ოფიციალურ ვებგვერდზე.

რომის პაპი ფრანცისკე, რომის კათოლიკური ეკლესიის პირველი ლათინო ამერიკელი ლიდერი, 21 აპრილს 88 წლის ასაკში გარდაიცვალა.  დაკრძალვის ცერემონია 26 აპრილს გაიმართება. პაპ ფრანცისკეს სანტა მარია მაჯორეს ბაზილიკაში დაკრძალავენ. ერისკაცობაში  ხორხე მარიო ბერგოლიო რომის პაპი 2013 წლის მარტში, პაპი ბენედიქტე XVI ტახტიდან გადადგომის შემდეგ გახდა.

ახალ პაპს  კარდინალთა კოლეგია ირჩევს, რომლის წევრებსაც თავად პაპი ნიშნავდა. ახალ პაპის არჩევაში მონაწილეობენ „პაპაბილები“ ანუ ისინი, ვისაც ჯერ 80 წელი არ შესრულებიათ. ტრადიციულად, კონკლავი (კათოლიკური ეკლესიის კარდინალთა კოლეგიის შეხვედრა) 15-დღიანი გლოვის შემდეგ იწყება. ამჟამად, კოლეგიაში შედის 252 კათოლიკე კარდინალი, რომელთაგან ხმის მიცემის უფლება აქვს 135 აქვს, დანარჩენებს შეუძლიათ მხოლოდ მონაწილეობა მიიღონ დებატებში.  თითოეული კარდინალი ხმას აძლევს სასურველ კანდიდატს მანამ, სანამ პაპი არ იქნება არჩეული, რადგან პაპის ასარჩევად საჭიროა ხმების 2/3-ს პლუს ერთი ხმა ანუ ჯამში 91. კენჭისყრა შეიძლება დღეების, კვირების ან თვეების განმავლობაში გაგრძელდეს. იმ შემთხვევაში, თუ წმინდა პეტრეს ტაძრის, სიქსტის კაპელას ბუხრიდან შავი კვამლი ამოვიდა, ეს ნიშნავს, რომ კონკლავი ვერ შეთანხმდა და კენჭისყრა გრძელდება. ხოლო, თეთრი კვამლის ამოსვლა უკვე ნიშანია, რომ ახალი პონტიფექსი  არჩეულია.

თეორიულად, რომის პაპი ნებისმიერი მონათლული კათოლიკე მამაკაცი შეიძლება გახდეს. თუმცა, პრაქტიკაში, კარდინალები თავიანთი რიგებიდან ერთ-ერთს ირჩევენ. 2013 წელს ფრანცისკე გახდა პირველი პონტიფიკოსი, რომელიც წარმოშობით ლათინური ამერიკიდან იყო, რეგიონიდან, რომელიც მსოფლიო კათოლიკეების დაახლოებით 28%-ს შეადგენს. ისტორიული მაგალითებით,  კარდინალები უფრო ხშირად ირჩევენ ევროპელს, განსაკუთრებით იტალიელს. დღემდე არჩეული 266 პაპიდან 217 იტალიელი იყო.

საერთაშორისო მედიები უკვე აქტიურად ასახელებენ სავარაუდო კანდიდატებს. მაგალითად, Reuters-ის მიხედვით,  მომდევნო პაპის სავარაუდო კანდიდატებია: მარსელის მთავარეპისკოპოსი ჟან-მარკ აველინი; უნგრელი  კარდინალი პეტერ ერდე; ბარსელონის არქიეპისკოპოსი ხუან ომელა; არქიეპისკოპოსი ჯოზეფ ტობინი; განელი კარდინალი პიტერ ტურკსონი და სხვ.

პაპის გარდაცვალებას არა ერთი ქვეყნის ლიდერი, მათ შორის, უკრაინის პრეზიდენტი, გამოეხმაურა და სამძიმარი გამოთქვა. პრეზიდენტმა ზელენსკიმ X-ზე დაწერა: „მილიონობით ადამიანი მთელ მსოფლიოში გლოვობს რომის პაპ ფრანცისკეს გარდაცვალების ტრაგიკულ ამბავს. მან ცხოვრება ღმერთს, ხალხსა და ეკლესიას მიუძღვნა. მან იცოდა, როგორ მიეცა იმედი, შეემსუბუქებინა ტანჯვა ლოცვით და ხელი შეეწყო ერთობისთვის. ის ლოცულობდა მშვიდობისთვის უკრაინაში და უკრაინელებისთვის. ჩვენ ვწუხვართ კათოლიკეებთან და ყველა ქრისტიანთან ერთად, ვინც სულიერი მხარდაჭერისთვის პაპ ფრანცისკეს მიმართავდა. მარადიული ხსოვნა!“.

უკრაინის პრეზიდენტის მრჩეველმა დიმიტრო ლიტვინმა ჟურნალისტებს 22 აპრილს განუცხადა, რომ პრეზიდენტი ზელენსკი მეუღლესთან ერთად აპირებს, 26 აპრილს რომის პაპის დაკრძალვას დაესწროს. ამ ეტაპზე, რომის პაპის გარდაცვალებასთან დაკავშირებით, პრეზიდენტს სხვა განცხადება არ გაუკეთებია.