სოციალურ ქსელში ივანკა ტრამპის ყალბი პოსტი ვრცელდება

სოციალურ ქსელ Threads-ზე ვრცელდება პოსტი, რომლის თანახმადაც, აშშ-ის ახლადარჩეული პრეზიდენტის, დონალდ ტრამპის შვილმა, ივანკა ტრამპმა პლატფორმა X-ზე ზელენსკის ფოტო დამცინავი კონტექსტით გამოაქვეყნა. სინამდვილეში აღნიშნული პოსტი ივანკა ტრამპს არ ეკუთვნის. (არქივირებული ბმული)

ანგარიშის სახელი, რომელმაც X-ზე პოსტი გამოაქვეყნა შემდეგია: @IvankaNews. მართალია, ანგარიშს ვერიფიკაციის ლურჯი სიმბოლო აქვს, თუმცა ის ივანკა ტრამპს არ ეკუთვნის. ლურჯი სიმბოლო ნებისმიერ მომხმარებელს შეუძლია ჰქონდეს, თუ ის X Premium-ის გამომწერია. თავის მხრივ, X Premium-ის გამოწერა გარკვეული თანხის გადახდის შემთხვევაში ყველას შეუძლია. იმ ფაქტს, რომ აღნიშნულ ანგარიშს ივანკა ტრამპთან კავშირი არ აქვს, ადასტურებს მისივე აღწერა: „ანგარიში არ არის აფილირებული ივანკა ტრამპთან“. ანგარიშის აღწერაშივეა მითითებული ივანკა ტრამპის ნამდვილი გვერდი: @IvankaTrump.

საგულისხმოა, რომ გავრცელებულ ფოტოანაბეჭდზე მითითებულია, რომ ანგარიშმა @IvankaNews_ პოსტი 2024 წლის 8 დეკემბერს გაავრცელა, თუმცა 2024 წლის 30 დეკემბრისთვის აღნიშნულ ანგარიშზე პოსტი არ იძებნება. მსგავსი პოსტი არ იძებნება არც ივანკა ტრამპის X-ის ნამდვილ ანგარიშზე. შესაბამისად, გავრცელებული მტკიცება ყალბია.