სატირა: „ერთიანმა ნაციონალურმა მოძრაობამ“ საარჩევნო სიაში გორ მინასიანი წარადგინა
სოციალურ ქსელში Facebook-ანგარიშები პოსტს ავრცელებენ (1,2), რომლის მიხედვითაც, ნაციონალურმა მოძრაობამ გორ მინასიანი საარჩევნო სიაში წარადგინა. პოსტის აღწერაში ვკითხულობთ, „აქაც მეორე ადგილისთვის იბრძოლებს“. რეალურად, პოსტი სატირული შინაარსის არის, გორ მინასიანი ეთნიკურად სომეხი ძალოსანია, რომელიც საქართველოს მოქალაქეობას არ ფლობს, შესაბამისად, საარჩევნო სიაშიც ვერ მოხვდებოდა. თანაც, კოალიციას „ერთიანობა – ნაციონალური მოძრაობა“, ჯერჯერობით, საარჩევნო სია არ წარუდგენია.
აღსანიშნავია ისიც, რომ კოალიციას „ერთიანობა – ნაციონალური მოძრაობა“, რომელშიც „ნაციონალური მოძრაობის“ გარდა, „სტრატეგია აღმაშენებელი“ და „ევროპული საქართველო“ შედის, საარჩევნო სია ჯერჯერობით არ წარუდგენია. სიაში უცხო ქვეყნის მოქალაქე ვერ მოხვდება, რადგან საქართველოს კონსტიტუციის 37-ე მუხლის მე-4 პუნქტში განსაზღვრულია, რომ „პარლამენტის წევრად შეიძლება აირჩეს საარჩევნო უფლების მქონე საქართველოს მოქალაქე 25 წლის ასაკიდან, რომელსაც საქართველოში უცხოვრია 10 წელს მაინც“.
ცნობისთვის, გორ მინასიანი 29 წლის ეთნიკურად სომეხი ძალოსანია, რომელიც მიმდინარე წელს პარიზის ოლიმპიადაზე ბაჰრეინის სახელით გამოდიოდა და ბრინჯაოს მედალს დაეუფლა. ქართველმა ძალოსანმა ლაშა ტალახაძემ კი ორჭიდის ჯამში 470 კილოგრამი დააფიქსირა და ოქროს მედალი მოიპოვა. ბოლო 14 წლის განმავლობაში, როცა ტალახაძე და მინასიანი ერთად ასპარეზობდნენ, სომეხმა ძალოსანმა ოქროს მედლის აღება ვერც ერთხელ შეძლო.
აღნიშნული Facebook-პოსტი მას შემდეგ გავრცელდა, რაც მმართველმა პარტიამ „ქართულმა ოცნება“ პროპორციული სიის პირველი ოცეული წარადგინა და სიაში მე-7 ადგილს სწორედ სამგზის ოლიმპიური ჩემპიონი, ძალოსანი ლაშა ტალახაძე იკავებს.
ამდენად, გავრცელებული პოსტი სატირული შინაარსის არის და მცდარია მტკიცება, რომ „ერთიანობა – ნაციონალური მოძრაობა“ კოალიციამ საარჩევნო სიაში გორ მინასიანი წარადგინა.
