ოპოზიციის ლიდერების სუფრაზე გადაღებული ვიდეო AI გენერირებულია
სოციალურ ქსელში გავრცელდა ვიდეო, სადაც პარტია "ახალის" ლიდერი ნიკა გვარამია და "გირჩი მეტი თავისუფლების" ლიდერი ზურაბ ჯაფარიძე ჩანან (ბმული 1, 2, 3, არქივირებული ბმული 1, 2, 3). ვიდეოში ჩანს, რომ პოლიტიკოსები სუფრასთან სხედან და უხამსი შინაარსის სიმღერას მღერიან, სახელწოდებით "იანეთი და მანჯურია".
იქიდან გამომდინარე, რომ ვიდეოში არსებული ხმა არ ემთხვეოდა ნიკა გვარამიასა და ზურა ჯაფარიძის ხმას, "ჯეოფაქტსმა" აღნიშნული სიმღერის ორიგინალი ვერსია მოძებნა. აღმოჩნდა, რომ როგორც მუსიკის, ისე ვიდეოს ორიგინალი დაუმუშავებელი ვერსია YouTube-ზეა ხელმისაწვდომი და მასში სულ სხვა ადამიანები ჩანან.
ამდენად, ოპოზიციის დისკრედიტაციისთვის გავრცელებული ვიდეოს ბაზისად რეალური ვიდეო გამოიყენეს. სავარაუდოდ, სწორედ ეს ფაქტი, რომ რეალური ვიდეო გადაამუშავეს, განაპირობებს გავრცელებულ ვიდეოში AI-ისთვის დამახასიათებელი უზუსტობების ნაკლებობას. იმ შემთხვევაში როცა ვიდეო-მასალა მთლიანად ხელვნური ინტელექტის მიერ შექმნილია, ხშირად ვიზუალური უზუსტობები იკვეთება ხოლმე.
ის რომ ვიდეოს დასამუშავებლად სხვა ადამიანების ვიდეო გამოიყენეს დასტურდება სუფრის იდენტური ვიზუალით, მის გარშემო მსხდომი ადამიანების თანმიმდევრობით. იდენტურია ასევე, ნიკა გვარამიას და ვიდეოში მოცემული ადამიანის ხელი და მასზე ბეჭედი.
ამდენად, სოციალურ ქსელში გავრცელებული ვიდეო ნამდვილი არ არის. აღსანიშნავია ისიც, რომ რიგმა Facebook-ანგარიშებმა, რომლებმაც აღნიშნული ვიდეო გაავრცელეს, მიუთითეს, რომ ის ხელოვნური ინტელექტის გენერირებულია (არქივი).
