სოციალურ ქსელში პოლიტიკოს მურმან დუმბაძის სიტყვები უკონტექსტოდ ვრცელდება
მოკლედ საკითხავი
ქართულ ფეისბუქ სივრცეში გავრცელებული ვიდეოს ნაწყვეტი პოლიტიკოს მურმან დუმბაძის პოზიციას ისე წარმოაჩენს, თითქოს ის არ თვლის, რომ მმართველი პარტიის მიერ წარსულში მიღებული შემზღუდავი კანონმდებლობა და სხვა გადადგმული ნაბიჯები სახიფათოა.
დუმბაძის კომენტარების სრული ვერსია ცხადს ხდის, რომ ის წარსულში მიღებულ კანონმდებლობას ამჟამად მიმდინარე პარტიების აკრძალვას ადარებს და პარტიების აკრძალვა კიდევ უფრო სახიფათოდ მიაჩნია.
ქართულ ფეისბუქ სივრცეში გავრცელდა ვიდეო, რომელშიც პოლიტიკოსი მურმან დუმბაძე საუბრობს (დაარქივებული ბმული). ვიდეოს ნაწყვეტი პოლიტიკოს მურმან დუმბაძის პოზიციას ისე წარმოაჩენს, თითქოს ის არ თვლის, რომ მმართველი პარტიის მიერ წარსულში მიღებული შემზღუდავი კანონმდებლობა და სხვა გადადგმული ნაბიჯები სახიფათოა.
დუმბაძის კომენტარების შემდგომ ვხედავთ ნაწყვეტს პოპულარული ქართული კომედიური ფილმიდან "რაც ყველაზე ძალიან გიყვარს", რომლის ერთ-ერთი პერსონაჟიც უწმაწური სიტყვების გამოყენებით კითხულობს: "მერე აქამდე ჩუმად რატომ ხარ შენი...". ვიდეოს გამავრცელებელი ვიდეოს თან ასევე ურთავს კომენტარს: "ეეე არიცის".
ქართულ ფეისბუქ სივრცეში გავრცელებული ნაწყვეტი, სადაც მურმან დუმბაძე საუბრობს, ამოჭრილია მისი 12-წუთიანი ჩართვიდან ტელეკომპანია პირველის "დღის ამბებში", 2026 წლის 26 ოქტომბერს. ჩართვაში დუმბაძე კომენტარს აკეთებს საკონსტიტუციო სასამართლოში მიმდინარე მოსმენებზე რამდენიმე დიდი ოპოზიციური პოლიტიკური პარტიის აკრძალვის საკითხზე. ზოგადად მთლიანი ჩართვა საკმაოდ კრიტიკული ხასიათისაა მმართველი პარტიის და მის მიერ გატარებული პოლიტიკის მიმართ. ჩვენი განხილვისთვის საინტერესო მონაკვეთი ვიდეოს მიახლოებით 7:30 მონაკვეთიდან იწყება. დუმბაძე პარტიების აკრძალვის მიმდინარე პროცესს წარსულში მიღებულ კანონმდებლობასა და გადადგმულ ნაბიჯებს ადარებს და ამბობს, რომ არცერთი წარსული ნაბიჯი არ ყოფილა ისეთი სახიფათო, როგორიც პარტიების აკრძალვის საკითხია. დუმბაძე ამბობს:
"საქართველოს მოქალაქემ ეს კარგად უნდა გაიაზროს ეხლა. არ ყოფილა ასეთი მძიმე დანაშაულებრივი ასე ვთქვათ მოქმედება მიუხედავად იმისა, რომ ყოველდღიურად რაღაც ახალ-ახალ სისულელეებს ჩადის, ეს არის ყველაზე მძიმე რაც მე ამ 15 წლის განმავლობაში ბიძინა ივანიშვილისგან მოვისმინე. პირდაპირ გეტყვით რომ არც გრანტების კანონია ისეთი სახიფათო აკრძალვა, როგორც ახლა რაც ხდება და არც ის, რომ ვთქვათ ემიგრაციას არჩევნებში მონაწილეობის უფლება წაართვა და არც კიდევ უფრო მეტი, რაც ორი წლის წინ 2024 წლის ნოემბრის ბოლოს გამოგვიცხადა, რომ ის ევროკავშირის სტრუქტურებში გაწევრიანებას აჩერებს და ესეც არ არის იმდენად სახიფათო იმიტომ, რომ ადამიანებს აქვს უფლება ის კავშირი მოწონდეს ან არ მოწონდეს, მაგრამ როცა ხელისუფლება გეუბნება, რომ პოლიტიკური პარტიები უნდა გავაუქმოო, როცა გეუბნება, რომ კონკურენცია უნდა გავაუქმო, ის აუქმებს საქართველოს მოქალაქის თავისუფლებას, თავისუფალი არჩევნების უფლებას, ანუ უფლებას იმისას, რომ შენ იყო თავისუფალი..."
შესაბამისად, სრულ ინტერვიუში ჩანს, რომ მურმან დუმბაძე საქართველოს მმართველი პარტიის წარსულში გადადგმულ ნაბიჯებს, მათ შორის დასახელებულ კანონებს, არ ამართლებს, არამედ ოპოზიციური პოლიტიკური პარტიების აკრძალვის კონტექსტში საფრთხეების შედარებას ახდენს.
