მაგდა ანიკაშვილის ძველი გადაცემის ვიდეო სოციალურ ქსელში მანიპულაციურად ვრცელდება

მოკლედ საკითხავი

სოციალურ ქსელში გავრცელდა ჟურნალისტ მაგდა ანიკაშვილის ვიდეო, სადაც ის უცხოელების მიერ ქართული მიწების დამუშავებაზე საუბრობს.

ვიდეოს გამავრცელებლის მტკიცებით, ეს ასახავს ანიკაშვილის პოზიციას ქართული მიწების უცხოელებისთვის მიყიდვასთან დაკავშირებით. 

საკითხის შესწავლით ირკვევა, რომ ანიკაშვილი სატელვიზიო გადაცემის სპეციფიური ფორმატის ფარგლებში სტუმრის წინააღმდეგ მიზანმიმართულად იცავდა კონკრეტულ პოზიციას.

ქართულ ფეისბუქ სივრცეში გავრცელდა ჟურნალისტ მაგდა ანიკაშვილის ვიდეო, რომელშიც ის საუბრობს უცხოელების მიერ ქართული მიწების დამუშავებაზე (დაარქივებული ბმული). ანიკაშვილი ამბობს, რომ არ აქვს მნიშვნელობა რა ეროვნების ადამიანი დაამუშავებს ქართულ მიწას და რომ ადამიანების ეროვნებების მიეხედვით მსგავსი დისკრიმინაცია ქსენოფობიისა და ფაშიზმის გამოვლინებაა. ვიდეოს ადევს სავარაუდოდ გამავრცელებლის კომენტარი - "მაგდა ანიკაშვილი მიწის უცხოელებზე გაყიდვაზე", რითაც ხდება იმაზე მინიშნება, რომ ვიდეო მაგდა ანიკაშვილის პოზიციას გამოხატავს განსახილველ საკითხზე.

გავრცელებული ვიდეო წარმოადგენს მონაკვეთს ტელეკომპანია მაესტროს აწ უკვე შეწყვეტილი გადაცემიდან "ცეცხლის ხაზი". გადაცემა 2017 წლის შემდეგ აღარ გაგრძელებულა. გადაცემის წამყვანები, როგორც წესი მაგდა ანიკაშვილი და ვაკა გორგილაძე იყვნენ.

გადაცემის ფორმატი ითვალისწინებდა ერთ ცენტრალურ განსახილველ საკითხს, რომელსაც იხილავდნენ როგორც მიწვეული სტუმრები, ისე წამყვანები. ფორმატის მიხედვით სტუმრებიც და წამყვანებიც იყოფოდნენ ორ მხარედ. ერთი მხარე იცავდა განსახილველი საკითხის მხარდამჭერ პოზიციას, მეორე კი მის მოწინააღმდეგე პოზიციას, რაც ქმნიდა ერთგავარად მოდელირებული დებატების სცენარს. როგორც ჟურნალისტები, ისე სტუმრები, პერიოდულად საპირისპირო მხარეს მყოფების ჯვარედინ დაკითხვას აწყობდნენ. ჟურნალისტები ძირითადად საპირისპირო მხარეს მყოფ სტუმარს უსვამდნენ მწვავე შეკითხვებს და არა საკუთარ კოლეგა ჟურნალისტს, რომელიც ასევე საპირისპირო პოზიციას იცავდა.

სწორედ მსგავს ფორმატში წარიმართა ის გადაცემაც, რომლიდანაც ამოღებულია ქართულ ფეისბუქ სივრცეში გავრცელებული ვიდეო მონაკვეთი. განსახილველი კითხვა იყო - უნდა იყიდებოდეს თუ არა ქართული მიწა უცხოელებზე? გადაცემის სტუმრები, პოლიტიკოსები ვახტანგ მეგრელიშვილი და გიორგი ახვლედიანი ერთმანეთის საპირისპირო პოზიციას იცავდნენ - მეგრელიშვილი მიწის უცხოელებზე გაყიდვას ემხრობოდა, ახვლედიანი კი უპირისპირდებოდა. ანალოგიურად, გადაცემის ფორმატიდან გამომდინარე, ჟურნალისტი მაგდა ანიკაშვილი ვახტანგ მეგრელიშვილის მხარეს იჭერდა, ხოლო ვაკა გორგილაძე კი გიორგი ახვლედიანისას. ზემოთ აღწერილი ფორმატი გადაცემის დასაწყისში საკმაოდ ცხადადაა განმარტებული და ისიც მითითებულია, ვინ რა პოზიციას იცავს.

აღნიშნული კონტექსტი გვიჩვენებს, რომ გავრცელებულ ვიდეოში ჟურნალისტი მაგდა ანიკაშვილი საკუთარ პირად პოზიციას კი არ იცავს ქართული მიწის გაყიდვის შესახებ, არამედ მის მიერ წაყვანილი გადაცემის ფორმატის ფარგლებში მისთვის მინიჭებულ როლს ასრულებს და მის საპირისპირო მხარეს მყოფი სტუმრის, გიორგი ახვლედიანის ჯვარედინ დაკითხავს აწყობს.