სოციალურ ქსელში ნეთანიაჰუსა და პუტინის შეცდომაში შემყვანი შედარება ვრცელდება

სოციალურ ქსელ ფეისბუქში ვრცელდება ვიდეო, რომელშიც პარალელებია გავლებული ისრაელის პრემიერ ნეთანიაჰუსა და რუსეთის პრეზიდენტ პუტინს შორის.

ვიდეოს ავტორი ისრაელსა და რუსეთს, ასევე ბენიამინ ნეთანიაჰუსა და ვლადიმერ პუტინს ერთმანეთს ადარებს. ის მაყურებელს ეკითხება, თუ ეტყვის, რომ ადამიანი ქვეყანას 30 წლის განმავლობაში მართავს, იმპერიალისტია და უდანაშაულო ადამიანებს ხოცავს, რომელ პოლიტიკოსს დაასახელებდნენ. შემდეგ ავტორი ამბობს, რომ პუტინს კი არა, ნეთანიაჰუს გულისხმობდა.

ნეთანიაჰუსა და მისი პოლიტიკის შესახებ განსხვავებული მოსაზრებების მიუხედავად, მტკიცება, თითქოს ის, პუტინის მსგავსად, ისრაელს 30 წლის განმავლობაში მართავს,რეალობას არ შეესაბამება. 

ნეთანიაჰუ ისრაელის პრემიერ-მინისტრი პირველად 1996 წლის 18 ივნისს გახდა. მას ეს თანამდებობა 1999 წლის 6 ივლისამდე ეკავა, რის შემდეგაც ისრაელის პრემიერ-მინისტრი  ეჰუდ ბარაკი გახდა.

ნეთანიაჰუ პირველი პირის თანამდებობაზე 2009 წლის 31 მარტს დაბრუნდა და ის 2021 წლის 13 ივნისამდე ეკავა. 2021 წლის არჩევნების შემდეგ კოალიციური მთავრობა ჩამოყალიბდა, რომელსაც ქნესეთმა მხარი დაუჭირა და პრემიერ-მინისტრი ნაფტალი ბენეტი გახდა. ნეთანიაჰუმ კი ოპოზიციაში გადაინაცვლა.

ბენეტი პრემიერ-მინისტრის თანამდებობაზე 2022 წლის 1 ივლისამდე იმყოფებოდა, რის შემდეგაც პრემიერ-მინისტრი იაირ ლაპიდი გახდა. ლაპიდი თანამდებობას 2022 წლის 29 დეკემბრამდე იკავებდა, როდესაც ნეთანიაჰუ პრემიერ-მინისტრის პოსტს კვლავ დაუბრუნდა.

ნეთანიაჰუ პრემიერ-მინისტრის თანამდებობას 2022 წლის 29 დეკემბრიდან დღემდე იკავებს.

ამრიგად, 2026 წლის 25 სექტემბრის მდგომარეობით, ნეთანიაჰუს ისრაელის პრემიერ-მინისტრის თანამდებობა ჯამში დაახლოებით 19 წლის განმავლობაში ეკავა — სამ სხვადასხვა პერიოდში: 1996–1999 წლებში, 2009–2021 წლებში და 2022 წლის დეკემბრიდან დღემდე. შესაბამისად, ნეთანიაჰუს ისრაელი არათუ 30 წლის განმავლობაში უწყვეტად არ უმართავს, არამედ არჩევნების შედეგების შესაბამისად, პრემიერის თანამდებობის დატოვება რამდენჯერმე მოუწია, რა პერიოდშიც მათ შორის საპარლამენტო ოპოზიციის ლიდერიც იყო. პრემიერ-მინისტრობის პერიოდებს შორის ქვეყნის მთავრობას სხვა პრემიერ-მინისტრები ხელმძღვანელობდნენ, მათ შორის ეჰუდ ბარაკი, ნაფტალი ბენეტი და იაირ ლაპიდი.

შესაბამისად, ვიდეოში მოცემული მტკიცება, თითქოს ნეთანიაჰუ ისრაელს პუტინის მსგავსად უწყვეტად 30 წლის განმავლობაში მართავს, მცდარია.