უჩა აბაშიძის ვიდეო არასრული კონტექსტით ვრცელდება

სოციალურ ქსელებში ფეისბუქსა და ტიკტოკ-ზე ვრცელდება სამხედრო ბლოგერ, უჩა აბაშიძის ვიდეო, რომელიც პირადი ცხოვრების საიდუმლოს უკანონოდ მოპოვება-შენახვის მუხლითაა მსჯავრდებული. გავრცელებულ ვიდეო ფრაგმენტში უჩა აბაშიძე ამბობს: "ბალისტიკური ნიშნავს ბუხ-ბუნც" და ხელის ჟესტებისა და ხმოვანი ეფექტების გამოყენებით აღწერს რაკეტის მოძრაობას. ვიდეოებს თან ახლავს აღწერა, რომლებიც ბლოგერის არაკომპეტენტურობაზე მიუთითებს, მაგალითად, ერთ-ერთ ვიდეოს აწერია: "ძლიერი ექსპერტი ბუხ-ბუნც".(ბმული 1, 2, 3, 4, არქივირებული ბმული). სინამდვილეში ვიდეო იმგვარადაა მოჭრილი, რომ არ ჩანს სრული კონტექსტი და ბლოგერის გამოსვლაზე მცდარ შთაბეჭდილებას ქმნის.

სრულ ვიდეოში, რომელიც ბლოგერის YouTube არხზე 2023 წლის 17 მაისს გამოქვეყნდა ჩანს, რომ აღნიშნულ მონაკვეთამდე, აბაშიძე განმარტავს, რომ თემას გამარტივებული ფორმით, დაახლოებით ისე ხსნის, როგორც ეს საკუთარ შვილს აუხსნა. 3:19 წუთიდან, აბაშიძე ამბობს: "მეორე საკითხი გახსენებთ, რა არის ბალისტიკური და ფრთოსანები [რაკეტა]. იმ დღეს ბავშვს ვუხსნიდი და მივხვდი, რომ ძალიან ადვილი არის ტვინისთვის ასე გასაგებად. ბალისტიკური ნიშნავს ბუხ-ბუნც. კიდე არსებობს ბალისტიკური რაკეტა, რომელიც არის ფფშ-ბუნც. და ფფშ-ს როდის ვამთავრებ დააკვირდით. ფრთოსანი რაკეტა სინამდვილეში თვითმფრინავია, რაკეტა ქვია, რომელიც მიწას მოუყვება."

ის რომ ბლოგერი მიზანმიმართულად საუბრობს მარტივი ენით დასტურდება, უშუალოდ ვიდეოს აღწერაში, სადაც ის აღნიშნავს, რომ მისი მიზანია, მასალა მაყურებლისთვის მარტივად გასაგები იყოს და ამიტომ შეგნებულად არ იყენებს ზუსტ ციფრებს.

ამდენად, გავრცელებული ვიდეო კონტექსტის გარეშეა მოჭრილი და ბლოგერის კომპეტენციის შესაფასებად მცდარ შთაბეჭდილებას ქმნის.