ტყუილია, რომ რეჯეფ თაიფ ერდოღანმა აჭარის დაბრუნებაზე ისაუბრა

სოციალურ ქსელში ვრცელდება თურქეთის პრეზიდენტის, რეჯეფ თაიფ ერდოღანის ვიდეო, ის თარგმანის მიხედვით, შემდეგ ციტატას ამბობს (ბმული 1, 2, 3, 4): "სახელმწიფო საზღვრები ყოველთვის რუკაზე ხაზები არ არის. ჩვენ უნდა ავიღოთ პასუხისმგებლობა ჩვენი მოძმე ერების ბედზე, იმ ადამიანების, რომლებიც ერთ ენაზე საუბრობენ, ცხოვრობენ ისტორიულ თურქულ მიწებზე და სწამთ ერთი ღმერთის.
მე მჯერა, რომ თურქეთი დაბრუნდება აჭარაში, აღადგენს თავის პოზიციებს სირიაში და უზრუნველყოფს ყველა თურქი ხალხის დაცვასა და კეთილდღეობას“ (არქივირებული ბმული 1, 2).

აღსანიშნავია, რომ იდენტური ვიდეო რუსულენოვანმა ანგარიშბმაც გაავრცელეს (ბმული 1, 2). რუსულენოვან პოსტში დამატებით აღნიშნულია, რომ ერდოღანმა აღნიშნული განცხადება 2026 წლის 1 სექტემბერს გააკეთა.

აღნიშნული ვიდეოს Google-ის ფოტოსურათის უკუძიების ინსტრუმენტით ძებნისას მივყავართ ვიზუალურად იდენტურ ვიდეო-მასალამდე, რომელიც აღწერის თანახმად, არა 2026 წლის 1 სექტემბრის გამოსვლას, არამედ ერდოღანის 26 თებერვლის გამოსვლას ასახავს. იდენტური ვიდეო ხელმისაწვდომია თურქეთის სპორტის მინისტრის X გვერდზე, რომელსაც პრეზიდენტ ერდოღანის გამოსვლის ტექსტიც თან ახლავს (არქივირებული ბმული).

თურქეთის სპორტის მინისტრის ოსმან ბაკის პოსტი 2026 წლის 26 თებერვალს არის გამოქვეყნებული. პრეზიდენტ ერდოღანის გამოსვლის ამსახველი ფოტო-მასალა ასევე იძებნება თურქეთის მთავრობის კომუნიკაციების დირექტორატის Instagram-გვერდზე. მითითებული აღწერის თანახმად, პრეზიდენტის სიტყვით გამოსვლა მის სტუდენტებთან, ათლეტებთან და ახალგაზრდებთან ვახშმის ფარგლებში შედგა. გამოსვლის ვიდეო ასევე ხელმისაწვდომია სხვა თურქული მედია საშუალებების სოციალური ქსელების გვერდებზე.

ის რომ სოციალურ ქსელში გავრცელებული და 2026 წლის 26 თებერვალს თურქეთის ოფიციალური უწყებებისა და მედიის მიერ გამოქვეყნებული ვიდეოები იდენტურია, დასტურდება ვიდეოში არსებული დეტალებით. მაგალითად, პრეზიდენტის ჰალსტუხი, მის უკან არსებული კრემისფერი ფონი იდენტურია, იდენტურია ასევე მაგიდაზე განთავსებული ჭიქის მდებარეობა და ფონად დადგმული დროშები.

თურქეთის რესპუბლიკის კომუნიკაციების დირექტორატის ვებგვერდზე ხელმისაწვდომია გამოსვლის ტექსტიც (ინვლისურენოვანი- მოკლე ვერსია, თურქულენოვანი - უფრო ვრცელი ვერსია). ტექსტიდან ირკვევა, რომ ერდოღანის გამოსვლის მთავარი თემა თურქეთის განვითარებაში ახალგაზრდების როლს შეეხებოდა. გამოსვლისას პრეზიდენტმა ასევე ისაუბრა განათლებაში, სპორტში, ტექნოლოგიებსა და თავდაცვის ინდუსტრიაში ახალგაზრდებისთვის განხორციელებულ ინვესტიციებზე. გამოსვლის ტექსტში არ იძებნება სიტყვები "აჭარა", "სირია". დამატებით, რეჯეფ თაიფ ერდოღანისა და "აჭარის" Google-ით ძიებისას გავრცელებული ამბის დამადასტურებელი სიახლე არ იძებნება. არც ქართული და არც თურქული სანდო მედია აღნიშნულ სკანდალურ განცხადებაზე არ წერს, რაც დამატებით მიუთითებს, რომ გავრცელებულ ვიდეოში მოცემული ხმა და შესაბამისად, მისი ნათარგმნი სუბტიტრებიც გაყალბებული და პროგრამულად დამუშავებულია.

წარსულში პრეზიდენტ ერდოღანს თურქეთის ისტორიულ კავშირებზე აჭარაში ნამდვილად უსაუბრია, თუმცა, ეს თურქეთის რეგიონში მცხოვრებ სხვადასხვა ხალხთან ისტორიული და კულტურული კავშირზე ხაზგასმით მოხდა და არა საქართველოს თუ რეგიონში სხვა ქვეყნების ტერიტორიული მთლიანობის დარღვევის კონტექტში (იხილეთ სტატია).