მიხეილ სააკაშვილის ციტატა ევროპის შესახებ კონტექსტის გარეშე ვრცელდება
სოციალურ ქსელებში ვირუსულად ვრცელდება მიხეილ სააკაშვილის ვიდეო, რომელშიც საქართველოს მესამე პრეზიდენტი ევროპასა და დასავლეთს გარყვნილებასთან აიგივებს (Facebook ბმულები: 1, 2, 3, 4, 5; Instagram: 1; tiktok: 1, არქივირებული ბმული). ვიდეოს მიხედვით მიხეილ სააკაშვილი ამბობს: “"რას ნიშნავს ევროპა და დასავლეთი? ეს ნიშნავს ჰომოსექსუალიზმს, ეს ნიშნავს გარყვნილებას, ეს ნიშნავს აღვირახსნილობას".
ვიდეორედაქტირების ხელსაწყოების გამოყენებით მიხეილ სააკაშვილის გამოსვლა აქ წყდება და გრძელდება ქალის ვიდეოთი, რომელიც ტრამპის ინაუგურაციაზე პროტესტის ნიშნად ყვირის. ამ მონაკვეთზე დატანილია წარწერა „აკაცუკები“. შესაბამისად, მოცემული ვიდეო ერთდროულად შეცდომაში შემყვანიცაა და ოპოზიციურად განწყობილი მოქალაქეებისა თუ სამოქალაქო აქტივისტების დისკრედიტაციასაც ისახავს მიზნად.
ვიდეოს ორიგინალი ვერსია სოციალურ ქსელში საკუთარ გვერდზე მიხეილ სააკაშვილმა გაავრცელა. სრულ გამოსვლაში საქართველოს მესამე პრეზიდენტი ამბობს:
„დღესაც ისევ ხელახლაა ლაპარაკი, რომ პრინციპში ყველა ჩვენი მეზობელი ჩვენი მტერია და ერთადერთი რაც არის ჩვენთვის - ერთმორწმუნე რუსეთი. და რასაც ჩვენ გვეუბნებიან არის, რომ აი რაა რის ევროპა? ევროპა ხო გასაგებია რაც არის? ევროპა არის დეგრად..
პუტინმა ახლა ეს ჩამოაყალიბა იდეალურად ვალდაის ჯგუფთან შეხვედრაზე. თუ კარგად ნახავთ, ერთი და იგივე მოტივია საქართველოში, მოლდოვაში, უკრაინაში, ზუსტად ერთი და იგივე. ზუსტად იგივე ხდება, ერთი ერთზე. კიევის ცენტრში გამოდის ხალხი და იძახიან რომ ევროპა ნიშნავს ჰომოსექსუალიზმს, რომ ქრისტიანული ზეიმები ჩაანაცვლა ევროპაში გეი ფერეიდმა, რაც [აქაც] კარგად ცნობილია.
ზუსტად იგივეა მოლდოვაში, რომ ეს არის… რას ნიშნავს ევროპა და დასავლეთი? ეს ნიშნავს ჰომოსექსუალიზმს, ეს ნიშნავს გარყვნილებას, ეს ნიშნავს აღვირახსნილობას მაშინ, როცა არსებობს აგერ ერთმორწმუნე ჩვენი საყვარელი რუსეთი, რომელსაც ის მაინც აქვს, რომ ჩვენნაირი რწმენა აქვს.
ოღონდ ამ დროს უნდა გვქონდეს სრული ამნეზია და ვერ მივხვდეთ იმას, რომ რუსეთმა გააუქმა საქართველოს ეკლესიის ავტოკეფალია, რუსეთმა საბჭოთა კავშირის დროს მოკლა ერთი პატრიარქი და აწამა ამბროსი ხელაია - მეორე პატრიარქი ძალიან მძიმედ. რუსეთმა მოკლა რამდენიმე ჩვენი ეპისკოპოსი. ჩვეულებრივად - გააქრო, მოკლა, ჩამარხა. რუსეთმა გადაღება ჩვენი ეკლესიები არამხოლოდ მე-19 საუკუნეში არამედ 2010-ში, 11-ში, 12-ში, აფხაზეთში მაგალითად.”
ვიდეოს სრული ვერსიიდან ცხადია, რომ მიხეილ სააკაშვილი თავის ამ გამოსვლაში ანტი-ლგბტ მოძრაობების უკან რუსულ კვალს ხედავს. ის არათუ თავად ამბობს, რომ ევროპა არის გარყვნილება და ჰომოსექსუალიზმი, არამედ ვინც ამას ამბობს, მათ რუსული პროპაგანდის გავრცელებაში ადანაშაულებს. სოციალურ ქსელებში ვირუსულად გავრცელებულ ვიდეოში კი გამოსვლის ამ სრული მონაკვეთიდან, რომელიც 99 წამი გრძელდება, 5 წამიანი მონაკვეთია მოჭრილი და იმგვარადაა რედაქტირებული, რომ სოციალური ქსელების მომხმარებლები შეცდომაში შეყავს.
