გიორგი ახობაძის შესახებ შეცდომაში შემყვანი მასალა ვრცელდება
სოციალურ ქსელში გავრცელდა ვიდეო, რომელშიც ექიმი და სამოქალაქო აქტივისტი გიორგი ახობაძე ჩანს. ვიდეოს დადებული აქვს ხმა, რომლითაც თითქოს ახობაძე ნარკოტიკული საშუალებების რეალიზატორობას აღიარებს. ვიდეოს თან ერთვის წარწერა: "შიგევროპელი ბარიგა".
აღსანიშნავია, რომ ეს არ არის პირველი შემთხვევა, როდესაც ექიმ გიორგი ახობაძის დისკრედიტაციის მიზნით რედაქტირებული და მანიპულირებული მასალები ნარკოდამოკიდებულების თუ გასაღების კონტექსტში ვრცელდება. "ჯეოფაქტსმა" გასულ წელსაც გამოაქვეყნა სტატია ხელოვნური ინტელექტით შექმნილ ფოტომასალაზე, რომელიც ახობაძის დისკრედიტაციას ისახავდა მიზნად.
ამჯერად გავრცელებულ პოსტში, სავარაუდოდ, აღებული ტვ პირველის მიერ გამოქვეყნებული ვიდეო, რომელიც 2026 წლის 25 ივლისს გამოქვეყნდა. ტვ პირველთან ინტერვიუში ახობაძე მის წინააღმდეგ მოსამართლე მანუჩარ ცაცუას მიერ გამოტანილ გადაწყვეტილებას ეხმაურება, რომლითაც აქტივისტს 25 დღიანი პატიმრობა შეეფარდა. ორიგინალ ინტერვიუში ის იმ პოლიციელებზე საუბრობს, რომელიც ახობაძის შეფასებით, საქართველოს წინაშე დადებული ფიცის ნაცვლად, დანაშაულს ჩადიან ადამიანების წამების თუ მათთვის ნარკოტიკების ჩადების გზით.
პოლიციამ გიორგი ახობაძე 2024 წელს ნარკოდანაშაულის ბრალდებით დააკავა და სწორედ აღნიშნულ საქმეს უკავშირდება სოციალურ ქსელში გავრცელებული ვიდეოს კონტექსტიც, რომელიც ირიბად მის ბრალეულობაზე მიანიშნებს.
ექიმი გიორგი ახობაძე პოლიციამ საპროტესტო აქციიდან სახლში დაბრუნებისას 2024 წლის 7 დეკემბერს აიყვანა. მას სისხლის სამართლის კოდექსის 260-ე მუხლის „ა“ პუნქტით ჩადენილ დანაშაულს ედავებოდნენ, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს. ბრალის დამტკიცების შემთხვევაში მას 8-დან 20 წლამდე ან უვადო პატიმრობა ემუქრებოდა. თუმცა, 2025 წელს სასამართლომ ახობაძე უდანაშაულოდ ცნო და ის სასამართლოს დარბაზიდანვე გაათავისუფლეს.
მოსამართლეების განცხადებით, ახობაძისა საქმეში „ნეიტრალური“ და „გონივრულ ეჭვს მიღმა სტანდარტის“ მტკიცებულები არ არსებობდა. ახობაძის საქმეზე თბილისის საქალაქო სასამართლო სოციალურ ქსელში პოსტი გამოაქვეყნა, სადაც აღნიშნა: „2025 წლის 6 აგვისტოს, თბილისის საქალაქო სასამართლოს სისხლის სამართლის საქმეთა კოლეგიის განაჩენით გიორგი ახობაძე ცნობილ იქნა უდანაშაულოდ და გამართლდა წარდგენილ ბრალდებაში. საქმის მასალების მიხედვით გიორგი ახობაძეს ბრალად ედებოდა განსაკუთრებით დიდი ოდენობით ნარკოტიკული საშუალების უკანონო შეძენა და შენახვა, დანაშაული გათვალისწინებული საქართველოს სსკ-ის 260-ე მუხლის მე-6 ნაწილის „ა“ ქვეპუნქტით. სისხლის სამართლის საქმის არსებითად განხილვის შედეგად, სასამართლომ სათანადო სტანდარტის მტკიცებულებების არასაკმარისობის გამო გამოიტანა გამამართლებელი განაჩენი.“
ამდენად, სოციალურ ქსელში გავრცელებული პოსტი მცდარად მიანიშნებს ახობაძეზე, თითქოს ის ნარკოტიკების რეალიზატორია. სასამართლომ აღნიშნული ბრალდება არ დაადასტურა.
