სოციალურ ქსელში უკრაინაზე ელენე ხოშტარიას გაყალბებული ციტატა ვრცელდება
სოციალურ ქსელში გარცელდება საინფორმაციო ბარათი, რომელზეც თითქოს პარტია "ახალის" ლიდერის, ელენე ხოშტარიას ციტატაა დატანილი: "უკრაინას და საქართველოს შორის რომ სამხედრო კონფლიქტი მოხდეს, ჩვენ უკრაინის მხარეს დავდგებით" (ბმული 1, 2, 3, არქივირებული ბმული 1, 2, 3).
გავრცელებულ საინფორმაციო ბარათს ტელეკომპანია "მთავარის" პოსტებისთვის დამახასიათებელი ვიზუალი და კომპანიის ლოგო აქვს, რაც გავრცელებულ პოსტს დამატებით დამაჯერებლობას სძენს. სინამდვილეში "მთავარის" Facebook და Instagram გვერდებზე მსგავსი ციტატა არ იძებნება. დამატებით, Google-ის საძიებო სისტემაში აღნიშნული ციტატის ძიებას რაიმე რელევანტური შედეგი არ აქვს. მსგავსი ციტატა არ იძებნება ქართული მედიასაშუალებების ვებგვერდებზე (ბმული 1, 2, 3).
სინამდვილეში, ბარათი დამუშავებულია და მასზე ორიგინალი ტექსტი ამოცვლილია გამოგონილი ციტატით. რედაქტირებისთვის, სავარაუდოდ, გამოიყენეს "მთავარის" მიერ 17 ივლისს გამოქვეყნებული საინფორმაციო ბარათი (არქივი), რომელშიც პოლიტიკოსის იდენტური ფოტო და სათაურია ("ელენე ხოშტარიას წერილი ციხიდან") გამოყენებული. ორიგინალი პოსტი პოლიტიკოსის წერილს მოიცავს, სადაც ის მისი ჯანმრთელობის პრობლემების მიუხედავად, საზოგადოებას უცხადებს, რომ ის ბრძოლას აგრძელებს: "მეგობრებო, პირველ რიგში, დიდი მადლობა თანადგომისთვის, მაგრამ ჩემზე არ ინერვიულოთ. რუსებთან ბრძოლაში ბევრად მეტისთვის ვარ მზად. ცხადია, არც ერთი წამი არ ვაპირებ, რუსების არალეგიტიმურ ინსტიტუტებთან რაიმე დისკუსიაში შესვლას, ან მათთვის რაიმეს მტკიცებას და მითუმეტეს, რაიმეს თხოვნას, რაც უნდათ ის ქნან."
ორიგინალ და რედაქტირებულ საინფორმაციო ბარათებს შორის ასევე შეინიშნება სხვაობა გამოყენებულ ფონტებს შორის, რაც დამატებით ადასტურებს, რომ ტელეკომპანია "მთავარის" მასალა პროგრამულად დაამუშავეს. ამდენად, სოციალურ ქსელში გავრცელებული საინფორმაციო ბარათები რედაქტირებულია.
