სოციალურ ქსელებში ერლინგ ჰოლანის შესახებ მანიპულაციური ვიდეო ვრცელდება

სოციალურ ქსელ „ფეისბუქში“ მომხმარებელი ავრცელებს ვიდეოს, რომელზეც თითქოს ჩანს, როგორ ეშინია ერლინგ ჰოლანს სარკეში დანახული თავისივე გამოსახულების (არქივირებული ბმული).

მოცემული ვიდეო ვირუსულად გავრცელდა როგორც სოციალურ ქსელებში ქართულ ანგარიშებზე, ასევე სხვა ქვეყნებშიც. ვიდეოს ნამდვილობა რამდენიმე ფაქტების გადამმოწმებელმა ავტორიტეტულმა ორგანიზაციამ უკვე შეამოწმა (ბმული 1, ბმული 2)

ვიდეოს ორიგინალი ვერსია, AFP-ს ცნობით, ჩინურ სოციალურ ქსელში (Douyin – tiktok-ის მფლობელი კომპანიის ჩინურ ბაზარზე ტარგეტირებული აპლიკაცია) გავრცელდა. ვიდეოს ავტორი თავის ანგარიშზე ხშირად აქვეყნებს იუმორისტული შინაარსის მცირე კლიპებს. ვიდეოში ზუსტად იგივე გარემო ჩანს. სწორედ ეს იუმორისტული ვიდეო შემდგომში დაამუშავეს და აქციეს ერლინგ ჰოლანის ვირუსულ მიმ-ვიდეოდ.

ის რომ ვიდეო ყალბია სარკეში ჰოლანის ანარეკლზეც ჩანს. ფეხბურთელს მანჩესტერ სიტის შავი ფორმა აცვია, რომლის მხარზეც სპონსორის ლოგო უნდა იყოს გამოსახული. სპონსორი, რომლის ლოგოც შავი ფორმის მხარზეა დატანილი, არის კომპანია OKX - კრიპტოვაჭრობის ერთ-ერთი უმსხვილესი კომპანია. მისი ლოგო სიტის მაისურზე ასე გამოიყურება.

ხელოვნური ინტელექტი ვიდეოს შექმნისას ამგვარ მცირე დეტალებს ვერ აგენერირებს და სარკეში მოცემულ ანარეკლზეც შეცდომაა დაშვებული.

შესაბამისად, სოციალურ ქსელებში ვირუსულად გავრცელებული ეს ვიდეო ყალბია. ის ხელოვნური ინტელექტის გამოყენებით ან ვიდეორედაქტირების პროგრამული საშუალებების გამოყენებით ჩინური იუმორისტული ვიდეოს სახეცვლილ ვერსიას, ე.წ. "deepfake"-ს წარმოადგენს.