თამარ ჩერგოლეიშვილის ვიდეო კონტექსტის გარეშე ვრცელდება
სოციალურ ქსელ ფეისბუქში მომხმარებლები კონტექსტის გარეშე ავრცელებენ პარტია "ფედერალისტების" ლიდერის, თამარ ჩერგოლეიშვილის ვიდეოს (ბმული 1, ბმული 2, ბმული 3, ბმული 4, ბმული 5, არქივირებული ბმული). ვიდეო გავრცელდა სხვა პლატფორმებზეც (მაგალითად იხილეთ ტიკტოკის ბმული). ვიდეოს ნაწყვეტში თამარ ჩერგოლეიშვილი არანორმატიულ ლექსიკას იყენებს. „თქვენ ყველას ოყნა გჭირდებათ, თქვენი **** *******“, - ამბობს ვიდეოში ოპოზიციონერი პოლიტიკოსი.
სინამდვილეში, აღნიშნული ვიდეო არის ნაწყვეტი თამარ ჩერგოლეიშვილის 30 ივნისს გამოქვეყნებული ვიდეოს მომზადების პროცესიდან. ვიდეოთი „ფედერალისტების“ ერთ-ერთი ლიდერი პარლამენტში მომხდარ ჩხუბს გამოეხმაურა. ჩხუბი პარლამენტში 26 ივნისს მოხდა - პარლამენტის საგაზაფხულო სესიის ბოლო პლენარულ სხდომაზე, რომელზეც „ქართული ოცნების“ ლიდერი, პრემიერი ირაკლი კობახიძე წლის შემაჯამებელი მოხენებით წარსდგა. პარტიის „გახარია საქართველოსთვის“ წარმომადგენლის გიორგი შარაშიძის გამოსვლას დარბაზში ხმაური მოჰყვა, რაც მალევე ჩხუბში გადაიზარდა. ფიზიკურ დაპირისპირებაში მონაწილეობდნენ, მათ შორის, ლაშა ტალახაძე და გენო პეტრიაშვილი.
ვიდეოს ნაწყვეტში მოცემული ფრაზა, რომელიც არანორმატიულ ლექსიკას შეიცავს, თამარ ჩერგოლეიშვილს არ ეკუთვნის. სრულ ვიდეოში პოლიტიკოსი თავადვე განმარტავს, რომ პარლამენტში მომხდარი ჩხუბის დანახვაზე მას პირველი ეს „სკაბრეზი“ გაახსენდა. პოლიტიკოსი ციტირებს ტიციან ტაბიძის ლექსს „დადა მანიფესტი“ (არქივირებული ბმული). ლექსში ვკითხულობთ:„
ჩემი სული დაგლეჯილი ხურჯინია,
სპარსული რომ ჩამოაქვს ენზელიდან
შიგ ეტევა მთელი აზიის სისულელე
და ხარკს არ გადაიხდის საკავშირო რესპუბლიკისთვის.
რა შეედრება, როცა ყრუ სომეხი მუცელს იცლის
ექსპრესის მოლოდინში ვოკზალის გადაღმა
თქვენ ყველას ოყნა გჭირდებათ თქვენი დედა მოვტყან!!!…
ჩემს იქით პარიზია…
ელისეის მინდვრები…“
სოციალური ქსელების მოხმარებლები ვიდეოს ამ ნაწყვეტს მოცემული კონტექსტის გარეშე ავრცელებენ, რაც შთაბეჭდილებას ქმნის, თითქოს ოპოზიციონერი პოლიტიკოსი უბრალოდ არანორმატიულ ლექსიკას იყენებს. კონტექსტის გარეშე ამგვარი ვიდეოს გავრცელებას მაყურებელი შეცდომაში შეჰყავს და პოლიტიკოსის დისკრედიტაციას ახდენს.
