უკრაინაში ქალების ქიმიური კასტრაციის შესახებ კანონის ინიციირების შესახებ ყალბი ინფორმაცია ვრცელდება
სოციალურ ქსელ ფეისბუქში ვრცელდება ვიდეო, რომელშიც უკრაინის რადის სოციალური პოლიტიკის კომიტეტის ხელმძღვანელი დადანაშაულებულია ქალების კასტრაციის შესახებ კანონპროექტის ინიცირებაში. ვიდეოს მიხედვით, კანონპროექტი მიზნად ისახავს იმ ქალების კასტრაციას, რომელთაც ბავშვების შენახვის ეკონომიკური შესაძლებლობა არ აქვთ. ამის შემდეგ, უკრაინაში მოქმედი ხელისუფლება ნაცისტურ რეჟიმთანაა შედარებული (არქივირებული ბმული).
ვიდეოში მოსაუბრე რესპოდენტი ნიკოლაი აზაროვია - უკრაინის ყოფილი პრემიერი, რომელიც უკრაინაში თანამდებობას 2014 წლის თებერვლამდე იკავებდა. ის სწორედ იმ მთავრობის წევრი იყო, რომელმაც უკრაინის ევროკავშირთან ასოცირების ხელშეკრულების გაფორმებაზე უარი განაცხადა და რასაც უკრაინაში საპროტესტო გამოსვლები და, საბოლოოდ, რევოლუცია მოჰყვა. თანამდებობის დატოვებიდან რამდენიმე საათში აზაროვმა თავი ავსტრიას შეაფარა. 2025 წლის დეკემბერში მას უკრაინულმა სასამართლომ დაუსწრებლად მიუსაჯა 15 წლით პატიმრობა 4 მუხლით: სახელმწიფო ღალატი საომარი მოქმედებების დროს, შეთქმულება სახელმწიფო ხელისუფლების ხელში ჩასაგდებად, უკრაინის ტერიტორიული მთლიანობის წინააღმდეგ მოქმედება და უკრაინის წინააღმდეგ რუსეთის თავდასხმის / აგრესიის გამართლება.
რაც შეეხება დეპუტატს, რომელსაც ყოფილი პრემიერი აღნიშნული კანონპროექტის მომზადებას აბრალებს, ის უმაღლეს რადაში „ხალხის მსახურის“ სიით მოხვდა და ამჟამად სოციალური პოლიტიკისა და ვეტერანთა უფლებების დაცვის კომიტეტს ხელმძღვანელობს.
ყოფილი პრემიერის მიერ გაკეთებული განცხადება ფაქტობრივ საფუძველს არ ეყრდნობა. მსგავსი ინფორმაცია ავტორიტეტულ უკრაინულ მედიებს არ გაუვრცელებიათ. დამატებით, "ჯეოფაქტსმა" უკრაინის უმაღლესი რადის (საკანონმდებლო ორგანოს) პორტალზე რეგისტრირებულ კანონპროექტებშიც მსგავსი ვერაფერი იპოვა. გარდა ზოგადად მიმდინარე განსახილველი კანონპროექტებისა, მსგავსი შინაარსის კანონპროექტი არ იძებნება არც დეპუტატ ტრეტიაკოვას ინიციირებულ კანონპროექტებში (კანონპროექტების მოძიება მათი შინაარსის, სახელის, წამყვანი კომიტეტის, ინიციატორისა თუ სხვა ფილტრების საშუალებით შესაძლებელია ბმულზე: https://itd.rada.gov.ua/billinfo ).
ამგვარად, ინფორმაცია, რომ უკრაინაში სოციალური და ეკონომიკური შესაძლებლობის არმქონე ქალების კასტრაციის მიზნით კანონპროექტი დაინიციირდა, სიმართლეს არ შეესაბამება.
