სოციალურ ქსელში ედუარდ სააკაშვილისა და ცოტნე ივანიშვილის ყალბი ფოტო ვრცელდება
სოციალურ ქსელში ვრცელდება ფოტო, რომელზეც თითქოს ედუარდ სააკაშვილისა (მიხეილ სააკაშვილის შვილის) და ცოტნე ივანიშვილის (ბიძინა ივანიშვილის შვილის) შეხვედრაა ასახული. ფოტოს თან ერთვის წარწერა “მორიგდებიან”.
სინამდვილეში, აღნიშნული ფოტო რედაქტირებულია. ფოტოს ძირითადი ნაწილი აღებულია გოგი გვახარიას გადაცემიდან “შვილი”. გვერდის აღწერის მიხედვით: „შვილი“ არის „რადიო თავისუფლების“ პროექტი - ვიდეოინტერვიუების სერია, რომელშიც გოგი გვახარია არკვევს, როგორ ხედავენ შვილები მამებისა და დედების განვლილ ცხოვრებას.” სწორედ ამ ვიდეოინტერვიუების ფარგლებში ესაუბრა გოგი გვახარია მიხეილ სააკაშვილის შვილს. ინტერვიუს 19:30 წუთიდან იწყება სწორედ ის მონაკვეთი, რომლიდანაც ფოტოა აღებული. ხოლო შემდგომში, ფოტომონტაჟის საშუალებით კადრიდან წაშლილია რადიო თავისუფლების ლოგო.
შემდგომში, მოცემულ ფოტოზე, ჩასმულია ცოტნე ივანიშვილის ფოტო. 18 აპრილს ცოტნე ივანიშვილი "ქართული ოცნების" ახალგაზრდული ორგანიზაციის კონფერენციას დაესწრო და სიტყვით გამოვიდა. სწორედ აღნიშნულ შეხვედრაზე, ჯერ კიდევ მისი აუდიტორიაში ჯდომის დროს გადაღებული კადრებიდან არის მოჭრილი ფოტო, რომელიც შემდგომში ედუარდ სააკაშვილის კადრში პროგრამულად ჩასვეს. კონფერენციაზე ერთ-ერთი დამსწრე კითხვით მიმართავს ცოტნე ივანიშვილს და ვიდეოს მე-5 წამზე ჩანს კადრი, რომლიდანაც ფოტოს ორიგინალი ვერსიაა აღებული.
აღნიშნული ფოტოდან ამოჭრილი ცოტნე ივანიშვილის გამოსახულებას შეცვლილი აქვს ჰორიზონტალური ორიენტაცია (იხილეთ ქვედა ფოტო).
შესაბამისად, ფოტო, რომელიც სოციალურ ქსელში ვრცელდება, ყალბია. ის სინამდვილეში ორი, სხვადასხვა დროს ჩაწერილი, ვიდეოდან აღებული კადრების, ფოტომონტაჟის საშუალებით, გაერთიანების შედეგადაა შექმნილი და რეალურად ამგვარი შეხვედრა არ შემდგარა.
