ყალბი ამბავი, თითქოს ერაყი ოფიციალურად ჩაერთო ომში ისრაელის და აშშ-ს წინააღმდეგ
სოციალურ ქსელში ვრცელდება ინფორმაცია (ბმული 1, 2), თითქოს ერაყი ოფიციალურად ჩაერთო ომში ისრაელის და აშშ-ის წინააღმდეგ. სინამდვილეში, ერაყის ხელისუფლებამ მიიღო გადაწყვეტილება, რომ თუ მისი ტერიტორია და სამხედრო ძალები შეტევის ქვეშ მოექცევა, მიიღოს თავდაცვითი ზომები, რაც არ ნიშნავს აშშ-სა და ისრაელისთვის ომის გამოცხადებას, ან მათ წინააღმდეგ კონფლიქტში ჩართვას.
2026 წლის 28 თებერვალს ახლო აღმოსავლეთში დაიწყო ფართომასშტაბიანი სამხედრო კონფლიქტი, მას შემდეგ, რაც ამერიკის შეერთებულმა შტატებმა და ისრაელმა ერთობლივად შეუტიეს ირანის სამხედრო ინფრასტრუქტურას და პოლიტიკურ და სამხედრო ხელმძღვანელობას. ირანმა მალევე უპასუხა შეტევას და საპასუხო თავდასხმები განახორციელა რაკეტებით და დრონებით ისრაელზე, რეგიონში განთავსებულ აშშ-ის სამხედრო ბაზებზე და აშშ-ის და ისრაელის მოკავშირეებზე რეგიონში.
ომის დაწყებიდან რამდენიმე კვირაში კონფლიქტი რეგიონულ კონფლიქტში გადაიზარდა. ირანთან დაკავშირებულმა ჯგუფებმა, მათ შორის, იემენის ჰუსიტებმა, დაიწყეს შეტევები ისრაელზე, ხოლო სამხედრო მოქმედებების არეალი გაფართოვდა ლიბანში და სპარსეთის ყურის ქვეყნებში.
ამ კონფლიქტში ერაყი ერთ-ერთi ყველაზე მოწყვლადი აქტორია, რადგან მისი ტერიტორია გახდა როგორც აშშ-ის და ისრაელის, ისე ირანის დარტყმების ობიექტი, იმის გამო, რომ ერაყში განლაგებულია როგორც აშშ-ის სამხედრო ინფრასტრუქტურა, ისე ირანთან დაკავშირებული შეიარაღებული ჯგუფები. კონფლიქტის დაწყების პირველივე დღეს, 28 თებერვალს, სამხედრო შეტევები განხორციელდა ერაყში „სახალხო მობილიზაციის ძალების“ (PMF) წინააღმდეგ.
მარტის განმავლობაში მსგავსი ინციდენტები გახშირდა და უფრო მასშტაბური გახდა. 23–24 მარტს დასავლეთ ერაყში მდებარე PMF-ის შტაბებზე და ობიექტებზე მიტანილმა საჰაერო დარტყმებმა მინიმუმ 15 ადამიანის სიცოცხლე შეიწირა. ერაყმა ამ თავდასხმებში ამერიკის შეერთებული შტატები და ისრაელი დაადანაშაულა. 28 მარტს ჩრდილოეთ ერაყში, კირკუკის აეროპორტის მიმდებარედ, კიდევ ერთი საჰაერო თავდასხმა განხორციელდა PMF-ის შტაბზე, რასაც მოჰყვა მსხვერპლი როგორც მებრძოლებში, ისე ერაყელ პოლიციელებს შორის. ამავე პერიოდში დაფიქსირდა სხვა მსგავსი შემთხვევებიც, მათ შორის, თავდასხმები სამხედრო ბაზებზე, სადაც ერთად იყვნენ განლაგებული როგორც ერაყის რეგულარული სამხედრო ძალები, ისე PMF-ის ქვედანაყოფები.
ამ ფონზე, ერაყის ხელისუფლებამ დაგმო თავდასხმები, როგორც სუვერენიტეტის დარღვევა, და დაიწყო საპროტესტო კომუნიკაცია როგორც ვაშინგტონთან, ისე თეირანთან. ამასთან, ეროვნული უსაფრთხოების საბჭომ PMF-ს მისცა ნებართვა იმოქმედოს თავდაცვის ფარგლებში და უპასუხოს მასზე მიმართულ თავდასხმებს. სოციალურ ქსელში გავრცელებული ვიდეო ერაყის მთავრობის სწორედ ამ განცხადებას ასახავს, რომელიც 2026 წლის 24 მარტს შეიარაღებული ძალების წარმომადგენელმა გააჟღერა.
ამდენად, სოციალურ ქსელში გავრცელებული მტკიცება არ დასტურდება, ერაყი ისრაელისა და აშშ-ს წინააღმდეგ ომში არ ჩართულა.
