ამერიკულ ბაზაზე თავდასხმის ხელოვნური ინტელექტით გენერირებული ვიდეო ვრცელდება
სოციალურ ქსელში ვრცელდება ვიდეო, რომელიც თითქოს ამერიკულ სამხედრო ბაზაზე ირანის თავდასხმას ასახავს. იდენტური ვიდეო მსგავსი აღწერით სხვა ქვეყნებშიც გავრცელდა. მაგალითად, ფრანგული ფაქტების გადამმოწმებელი ორგანიზაციის AFP-ის თანახმად, ფრანგულ ენაზე გავრცელებული პოსტი ამტკიცებდა, რომ ვიდეო ქუვეითში ამერიკის ბაზაზე თავდასხმას ასახავდა.
მას შემდეგ რაც 2026 წლის 28 თებერვალს ისრაელმა და შეერთებულმა შტატებმა თეირანსა და ირანის სხვა ქალაქებში სამიზნეებზე თავდასხმა განახორციელეს, ირანი საპასუხოდ ისრაელისა და ყურის სხვა ქვეყნებში ამერიკული სამხედრო ბაზებსა და სხვა სამიზნეებს თავს მართლაც დაესხა. თუმცა, ვიდეო, რომელიც აღნიშნულ სამხედრო დაპირისპირების კონტექსში გავრცელდა, ხელოვნური ინტელექტით შექმნილია. აღნიშნულზე ვიდეოში არსებული უზუსტობები მიუთითებს.
ხელოვნური ინტელექტის კვალზე მიუთითებს ის ფაქტი, რომ ვიდეოში ჩანს როგორც რაკეტების აფრენა, ისე სამიზნეზე მოხვედრაც. სარაკეტო თავდასხმის შემთხვევაში, გაშვება იმგვარი მანძილიდან ხდება, რომელშიც მოხვედრის წერტილიდან მობილური ტელეფონით გადაღება შეუძლებელია.
დამატებით, ვიდეოში მოცემულ ოთხი კადრში (იხილეთ ქვემოთ), რომელიც მიჯრით გვხვდება, ჩანს ადამიანი/ჯარისკაცი, რომელიც უჩინარდება / ერწყმის დასაწყობებულ ყუთებს. ხელოვნური ინტელექტი მსგავს შეცდომებს ხშირად უშვებს.
კადრები ვიდეოდან - ბმული
AFP Factual-ის ანალიტიკოსებმა, რომლებმაც გავრცელებული ვიდეო შეისწავლეს, Google Earth-ის დახმარებით შეადარეს ვიდეოში არსებული ბაზის ინფრასტრუქტურა და განლაგება, ფრანგულენოვან პოსტში მოცემულ ინფორმაციასთან, რომლის თანახმად, ვიდეო ქუვეითში ამერიკის ბაზას ასახავდა. AFP-ის მიერ მოძიებული სატელიტური ფოტოს მიხედვით შენობების სრულ უმრავლესობას კუთხეებიანი სახურავი აქვს და არა მომრგვალებული, როგორც ეს სოციალურ ქსელში გავრცელებულ ვიდეოში ჩანს.
მომრგვალებული სახურავით ნაგებობათა მხოლოდ ერთი ჯგუფი გვხვდება და აქ, ვიდეოში მოცემული სურათისგან განსხვავებით, მიყოლებით მხოლოდ 4 ასეთი შენობა ჩანს. შესაბამისად, გარდა ხელოვნური ინტელექტის გამოყენებით გენერირებული ვიდეოებისთვის დამახასიათებელი სტანდარტული შეცდომებისა, ამ შემთხვევაში მომხდარის ადგილი დადასტურებულად არ ემთხვევა იმ ლოკაციას, რომელზეც ვიდეოს მიხედვით, თავდასხმა უნდა მომხდარიყო.
ფოტოანაბეჭდები აღებულია AFP-ს სტატიიდან. ხელმისაწვდომია ბმულზე: https://factuel.afp.com/doc.afp.com.A4WG6CV და კოორდინატებზე: 29°20'55.07"N 47°32'30.30"E
