რუსული სუპერ-თვითმფრინავის დაშვება თეირანში თუ გაყალბებული ვიდეო?
მოკლედ საკითხავი
სოციალურ ქსელში გავრცელებული ვიდეოს მიხედვით, თეირანში დაეშვა რუსული სადაზვერვო ძალების თვითმფრინავი ილიუშინ ილ-80
ვიდეოში ასახული თვითმფრინავის დიზაინი არ შეესაბამება ილიუშინ ილ-80-ს
ვიდეოში ასახული დიზაინის მქონე თვითმფრინავი რუსეთის საჰაერო ძალებს არ ჰყავს.
სოციალურ ქსელში ვრცელდება ინფორმაცია ვიდეოს სახით, რომლის მიხედვითაც თეირანში დაეშვა რუსეთის სადაზვერვო ძალების თვითმფრინავი ილიუშინ ილ-80 (Ilyushin Il-80), ე.წ. doomsday თვითმფრინავი (არქივი).
დასაწყისისთვის უნდა აღინიშნოს, რომ ე.წ. doomsday plane თავისი არსით არ წარმოადგენს სადაზვერვო თვითმფრინავს. ეს ტერმინი მიემართება საჰაერო ხომალდებს, რომელთა ფუნქციაც ბირთვული ომის დროს კონკრეტული ქვეყნის მთავრობის ყველაზე მაღალი რანგის წარმომადგენლების გადარჩენაა. მსგავსი საჰაერო ხომალდის ბორტზე მყოფ მაღალჩინოსნებს საშუალება უნდა ჰქონდეთ გააგრძელონ სამხედრო ძალების მართვა ბირთვული კონფლიქტის დროსაც. ასეთი ხომალდებს სპეციალური დიზაინი აქვთ, რათა მათ ბორტზე მყოფ პირებს ბირთვული კონფლიქტის პირობებშიც კი შეეძლოთ ცოცხლად დარჩენა.
მეორე მნიშვნელოვანი საკითხია, რომ ილიუშინ ილ-80-ის დიზაინი მნიშვნელოვნად განსხვავდება ვიდეოში ასახული თვითმფრინავის დიზაინისგან. თვითმფრინავის რეალური დიზაინის გაცნობისას მარტივი შესამჩნევია, რომ მას ცენტრალურ ნაწილში არ აქვს თეფშის ან ანტენისებრი მოწყობილობა.
რუსეთის საჰაერო ძალების Ilyushin Il-80
მსგავსი დიზაინები, როგორც წესი დამახასიათებელია ე.წ. AWACS - საჰაერო ადრეული გაფრთხილებისა და კონტროლის ფუნქციის მქონე ხომალდებისთვის, რომლებიც სადაზვერვო თვითმფრინავებს წარმოადგენენ.
ბრიტანეთის საჰაერო ძალების Boeing E-3 Sentry - AWACS ტიპის
ასეთი ფუნქციის მატარებელი საჰაერო ხომალდი რუსეთის საჰაერო ძალებსაც ჰყავს, თუმცა აღნიშნული ხომალდის, ბერიევ ა-100-ის (Beriev A-100) დიზაინი ასევე მნიშვნელოვნად განსხვავებულია ვიდეოში ასახული დიზაინისგან.
რუსეთის საჰაერო ძალების Beriev A-100 - AWACS ტიპის
ვიდეოში ასახულ საჰაერო ხომალდთან გარეგნულად ყველაზე ახლოს რუსეთის ფედერაციის პრეზიდენტის თვითმფრინავი Ilyushin Il-96-300PU დგას. თუმცა აქაც, მარტივი შესამჩნევია, რომ არც ამ მოდელს უყენია თეფშისებრი მოწყობილობა კორპუსის ცენტრში. ასევე, არ იძებნება ინფორმაცია, რომ რუსეთის პრეზიდენტი 2026 წელს ირანს ეწვია.
რუსეთის საჰაერო ძალების Ilyushin Il-96-300PU
