სოციალურ ქსელში სტენლი კუბრიკთან დაკავშირებით ყალბი ინფორმაცია ვრცელდება
მოკლედ საკითხავი
სოციალური ქსელის მომხმარებელი ამტკიცებს, რომ სტენლი კუბრიკი გულის შეტევით არ გარდაცვლილა და ფილმ "ფართოდ დახუჭული თვალების" შინაარსის გამო მოკლეს.
აღნიშნული მტკიცების ნამდვილობა არ დასტურდება არც პოლიციის და არც კუბრიკის ოჯახის წევრების მხრიდან.
სოციალურ ქსელში გავრცელდა ინფორმაცია, რომ ცნობილი რეჟისორი სტენლი კუბრიკი გულის შეტევით არ გარდაცვლილა (არქივირებული ბმული). გამავრცელებლის მტკიცებით, კუბრიკი მოკლეს ფილმ "ფართოდ დახუჭულ თვალებთან" დაკავშირებით, რომელიც პოსტის ავტორის აზრით, ჯეფრი ეპსტინის წვეულებებზეა დაფუძნებული. პოსტში ასევე ნათქვამია, რომ სტენლი კუბრიკს კიდევ 24 წუთის ვიდეო მასალა ჰქონდა, სადაც კონკრეტული პიროვნებები იყვნენ დასახელებული და ნაჩვენები, რომლის გამოქვეყნებაც მას აუკრძალეს.
სტენლი კუბრიკი 1999 წლის 7 მარტს, ჰარპენდენში, ჰერთფორდშირის საგრაფოში, ბრიტანეთში გარდაიცვალა. "ფართოდ დახუჭული თვალების" პირველი დახურული კინოჩვენება მსახიობებისა და სტუდის წარმომადგენლებისთვის 1999 წლის 1 მარტს გაიმართა. ფილმის „ფართოდ დახუჭული თვალები“ სიუჟეტი „თანამედროვე მანჰეტენის მდიდარი და გავლენიანი კლასების სექსუალური აკვიატების ისტორიაზე“ მოგვითხრობს.
სოციალურ ქსელში გავრცელებულ პოსტში მოცემული მტკიცება არახალია და რეჟისორის სიკვდილზე მსგავსი კონსპირაცია აქამდეც გავრცელებულა. კონსპირაციის ავტორები ამტკიცებენ, რომ კუბრიკი მაღალი ელიტის შესახებ ინფორმაციის გამჟღავნების გამო მოკლეს.
სინამდვილეში, არ არსებობს მტკიცებულება იმის შესახებ, რომ სტენლი კუბრიკი ბუნებრივი მიზეზებით არ გარდაცვლილა. კინორეჟისორის გარდაცვალების შემდეგ ჩატარებულმა სამედიცინო აუტოპსიამ აჩვენა, რომ მისი გარდაცვალების მიზეზი ბუნებრივი იყო.
რეჟისორის გარდაცვალების შემდეგ განცხადება გააკეთა ბრიტანეთში ჰერთფორდშირის პოლიციამ, სადაც კუბრიკი გარდაიცვალა. პოლიციის თქმით, "საეჭვო გარემოებები არ დაფიქსირებულა და გამოძიება არ დაიწყებოდა".
ამდენად, მტკიცება, რომ კუბრიკი მოკლეს, არ დასტურდება.
