ილონ მასკს არ უთქვამს, რომ რუსი ერი ყველაზე ნიჭიერია
მოკლედ საკითხავი
სოციალურ ქსელში გავრცელებული პოსტის თანახმად, ამერიკელი მილიარდერი ილონ მასკი აცხადებს, რომ რუსები მსოფლიოში ყველაზე ნიჭიერი ერია;
სინამდვილეში, ილონ მასკის მსგავსი განცხადება ღია წყაროებში არ იძებნება;
აღნიშნული განცხადება მილიარდერის მამას ეროლ მასკს ეკუთვნის.
სოციალურ ქსელში გავრცელებულ პოსტებში ვკითხულობთ, რომ ილონ მასკმა რუსები ყველაზე ნიჭიერ ერად მოიხსენია (დაარქივებული ბმული).
პირველ რიგში, მსგავსი ციტატა მასკის ოფიციალურ X ანგარიშზე არ გვხვდება. აღსანიშნავია, რომ ციტატას არც ინგლისურენოვანი სანდრო მედია ავრცელებს.
სინამდვილეში აღნიშნული განხადება ილონ მასკის მამამ, ეროლ მასკმა გასული წლის ივნისში რუსულ სამთავრობო ტელეარხ „ცარგრადთან" ინტერვიუს დროს გააკეთა. ეროლ მასკი ამ პერიოდში მოსკოვში იმყოფებოდა და ცნობილი რუსი პროპაგანდისტის, ალექსანდრ დუგინის მიერ ორგანიზებულ ფორუმში იღებდა მონაწილეობას. ფორუმი სახელწოდებით "Future 2050" 2025 წლის 9-10 ივნისს გაიმართა. ინტერვიუს დროს მან აღნიშნა, რომ რუსები მსოფლიოში ერთ-ერთი ყველაზე ჭკვიანი ერია: „მოუთმენლად ველი ყველას გაცნობას. რამდენადაც ვიცი, რუსები პლანეტის ერთ-ერთ ყველაზე ჭკვიან ხალხად ითვლებიან",-აღნიშნა ეროლ მასკმა.
ამდენად, მტკიცება, რომ რუსი ერის შესახებ ციტატა ილონ მასკს ეკუთვნის, სიმართლეს არ შეესაბამება.
