რა ვიცით შოტლანდიის ქალაქ დანდში მომხდარ ინციდენტთან დაკავშირებით, რომელშიც არასრულწლოვანი გოგონა იარაღით ხელში ფიგურირებს?
სოციალურ ქსელში Facebook-ანგარიში ვიდეოს ავრცელებს, რომელშიც არასრულწლოვანი გოგონები ჩანან. ერთ-ერთ მათგანს ხელში დანა და ნაჯახი უჭირავს. ვიდეოს შემდეგი აღწერა აქვს: „რადიკალმა მუსლიმმა მიგრანტმა ბრიტანეთში, ქალაქ დანდში მცირეწლოვანი შოტლანდიელი გოგონას გაუპატიურება დაუპირა. 12 წლის გოგონას დასაცავად უფრო 15 წლის და გამოესარჩლა.
იმ ფონზე როცა ლიბერალურ- მულტიკულტურული შიზოფრენიით დაავადებული ძალოვანი სტრუქტურები ვერ უზრუნველყოფენ დაიცვან საკუთარი მოქალაქეების უსაფრთხოება, ბავშვები თვითონ ცდილობენ დაიცვან ერთმანეთი.
საბოლოო ჯამში 15 წლის გოგონას 24 წლით ციხე ემუქრება, ხოლო რადიკალი მოძალადე მიგრანტი გაამართლეს. ესეთია ლიბერალური შიზოფრენიის რეალური სახე“ (არქივირებული ბმული).
სინამდვილეში, გავრცელებული ინფორმაცია ტყუილია. რეალურად, არასრულწლოვანი გოგონა ვიდეოში არა რადიკალ მუსლიმ მიგრანტს, არამედ ბულგარელ წყვილს, ქალს და კაცს, ეჩხუბება.
ვიდეო სხვადასხვა პლატფორმაზე ვირუსულად გავრცელდა (1; 2; 3;). ზოგიერთი პოსტში ამტკიცებდნენ, რომ ვიდეოში გოგონა და მისი მეგობრები მიგრანტების მხრიდან შევიწროებისა და თვალთვალის მსხვერპლი გახდნენ. ერთ-ერთი ასეთი პოსტი X-ზე ბიზნესმენმა ილონ მასკმაც გააზიარა შემდეგი აღწერით: „როგორი მთავრობა აკავებს პატარა გოგონებს, რომლებიც საკუთარ თავს იცავენ?”.
ვინაიდან ვიდეოს დიდი გამოხმაურება მოჰყვა და სხვადასხვა ინტერპრეტაციით გავრცელდა, შემთხვევასთან დაკავშირებით 2025 წლის 27 აგვისტოს შოტლანდიის პოლიციამ განცხადება გამოაქვეყნა. განცხადებაში ვკითხულობთ: „ჩვენთვის ცნობილია, რომ სოციალურ მედიაში ვრცელდება დეზინფორმაცია ინციდენტთან დაკავშირებით, რომელიც შაბათს, 2025 წლის 23 აგვისტოს, დანდიში, სენტ ენ ლეინზე მოხდა, სადაც ბულგარელ წყვილს ახალგაზრდები მიუახლოვდნენ. 12 წლის გოგოს ბრალად ედება ცივი იარაღის ფლობა. ის შესაბამის ორგანოებს გადაეგზავნება და ჩვენი გამოძიება გრძელდება. გვინდა მადლობა გადავუხადოთ ადგილობრივებს გამოძიებაში დახმარებისთვის და მოვუწოდოთ საზოგადოებას, რომ არ გაავრცელონ დეზინფორმაცია ამ ინციდენტთან დაკავშირებით და თავი შეიკავონ მის გარემოებებზე სპეკულირებისგან“.
ამგვარად, ოფიციალური წყაროების მიხედვით, ვიდეოში გოგონები რეალურად ბულგარელ წყვილს, ქალს და კაცს, ეჩხუბებიან და არა მუსლიმ მიგრანტს. შოტლანდიის პოლიციის მიხედვით, ბულგარელ წყვილს ახალგაზრდები თავად მიუახლოვდნენ, შესაბამისად, ინფორმაცია გოგონას გაუპატიურების მცდელობასთან დაკავშირებით, არ დასტურდება. ამასთან, 2025 წლის 3 სექტემბრის მონაცემით, არ არის ცნობილი, რა სახის სასჯელი ელის ვიდეოში მყოფ არასრულწლოვანს ცივი იარაღის ფლობისთვის და შესაბამისად, არ დასტურდება ინფორმაცია იმასთან დაკავშირებით, რომ გოგონას 24 წლით თავისუფლების აღკვეთა ემუქრება.
