სოციალურ ქსელში ლევან სანიკიძის ინტერვიუ რედაქტირებული სახით ვრცელდება
სოციალურ ქსელში Facebook-მომხმარებელი ავრცელებს ვიდეოს (დაარქივებული ბმული), რომელშიც „ნაციონალური მოძრაობის“ წევრის, ლევან სანიკიძის მიერ გაკეთებული განცხადებაა მოჭრილი: „კაცად არ მიმაჩნია, საერთოდ – ადამიანად. იცით, სჯობდა, რუსებს უნიტაზების მაგივრად ეს კაცი გაეყოლებინათ, რა. აი, ეს კაცი იყო წასაღები ამ ქვეყნიდან, მათი საკუთრებაა იმიტომ, რომ არის არაკაცი, მოღალატე…“
გავრცელებულ ვიდეოში ჩასმულია გუბაზ სანიკიძის ფოტოები. ამასთანავე, მოჭრილია ის ნაწილი, რომელშიც ლევან სანიკიძე დავით რაზმაძეს ახსენებს. საბოლოოდ კი, ვიდეო წარმოაჩენს, თითქოს სანიკიძე ამგვარი სიტყვებით მამამისზე, გუბაზ სანიკიძეზე საუბრობს. სინამდვილეში, ვიდეო რედაქტირებულია და ლევან სანიკიძე არა გუბაზ სანიკიძეს, არამედ გორის საკრებულოს თავმჯდომარეს, დავით რაზმაძეს აღწერს ამგვარი სიტყვებით.
2025 წლის 25 აგვისტოს ტელეკომპანია „ტვ პირველის“ ეთერში გასულ გადაცემაში „ანა ახალაიას დღის ამბები“ წამყვანმა საუბარი სტუმრად მოწვეულ ლევან სანიკიძესთან დაიწყო გორის საკრებულოს თავმჯდომარის, დავით რაზმაძის მიერ გაკეთებული განცხადების შესახებ. რაზმაძემ The New York Times-თან ინტერვიუში განაცხადა: „რუსები აქ, როგორც მშვიდობისმყოფელები შემოვიდნენ და მადლობა ღმერთს, რომ შემოვიდნენ, ვინაიდან, მიშას ხულიგნები მთელ ქალაქს ძარცვავდნენ“.
სწორედ აღნიშნულ საკითხზე ამბობს ლევან სანიკიძე:
„მოგესალმებით. სამარცხვინოა, რაც გორში ხდება არამხოლოდ „ქართულ ოცნებასთან“ მიმართებაში, არამედ, მგონია, რომ ეს არის ძალიან დიდი გამოწვევა გორელებისთვისაც. იმიტომ, რომ დავით რაზმაძე მიმაჩნია მე… კაცად არ მიმაჩნია, საერთოდ – ადამიანად. იცით, სჯობდა, რუსებს უნიტაზების მაგივრად ეს კაცი გაეყოლებინათ, რა. აი, ეს კაცი იყო წასაღები ამ ქვეყნიდან, მათი საკუთრებაა იმიტომ, რომ არის არაკაცი, მოღალატე. ჩვენ რომ თავმოყვარე სახელმწიფო და სისტემა გვყავდეს ჯერ ვერავინ ვერ გაბედავდა ამის თქმას, რაც იკადრა. ანწუხელიძეს, რომელაშვილებს, შინდისის გმირებს ხულიგნები ეძახა, მაროდიორები ეძახა და რუს მკვლელებს, ქართველი ქალების შავი ტანსაცმლით შემმოსავებს უწოდა მშვიდობისმყოფელები. ეს კაცი მინიმუმ დაპატიმრებული იქნებოდა სამშობლოს ღალატის მუხლით…“
ამრიგად, ვიდეო რედაქტირებულია, მასში ლევან სანიკიძე არა გუბაზ სანიკიძეზე, არამედ გორის საკრებულოს თავმჯდომარე, დავით რაზმაძის შესახებ საუბრობს.
