დეზინფორმაცია: დოქტორი ფაუჩი აღიარებს, რომ ბავშვთა 72 სავალდებულო ვაქცინიდან უსაფრთხოების ტესტირება არცერთზე არ ჩატარებულა

სოციალურ ქსელში ანგარიში „Tamuna Tamo”, რომლის გავრცელებული დეზინფორმაცია „ჯეოფაქტს“ აქამდეც გადაუმოწმებია, პოსტს აქვეყნებს (დაარქივებული ბმული) აღწერით: „დოქტორი ფაუჩი აღიარებს, რომ ბავშვთა 72 სავალდებულო ვაქცინიდან არცერთზე არასდროს ჩატარებულა უსაფრთხოების ტესტირება“. პოსტს თან ახლავს გამოცემა The People’s Voice-ის სტატიის ფოტო ანაბეჭდი. რეალურად, აშშ-ის ალერგიისა და ინფექციური დაავადებების ცენტრის ყოფილ დირექტორს, ენტონი ფაუჩის მსგავსი განცხადება არ გაუკეთებია. აღსანიშნავია ისიც, რომ The People’s Voice წარსულშიც არაერთი დეზინფორმაცია გაუვრცელებელია.

Facebook-ანგარიში ეყრდნობა The People Voice-ის სტატიას, რომელიც გასული წლის დეკემბერში გამოქვეყნდა. Media Bias/Fact Check-ის (გამოცემა, რომელიც მედიის მიკერძოებულობისა და მცდარი/ყალბი ახალი ამბების შესახებ საზოგადოების ინფორმირებას ემსახურება) თანახმად, The People’s Voice ყალბ ამბებს ხშირად ავრცელებს და არასანდო წყაროდ ითვლება. გამოცემის მიერ გავრცელებული ყალბი ინფორმაცია აქამდე „ჯეოფაქტსსაც“ გადაუმოწმებია.

გამოცემის სტატიაში არ არის წარმოდგენილი არც ერთი წყარო ან მტკიცებულება, რომელიც გაჟღერებულ მტკიცებას დაადასტურებდა. სტატიაში მოყვანილია აშშ-ის ჯანდაცვის ამჟამინდელი მინისტრის რობერტ ფ. კენედი უმცროსის 2023 წლის ჰილსდეილის კოლეჯში გამართული ღონისძიებიდან ჩანაწერი, რომელშიც ის იხსენებს, როგორ მოუწოდებდა ფაუჩის ეჩვენებინა კვლევები, რომლებიც დაადასტურებდა, რომ  ბავშვებისთვის სავალდებულო ვაქცინები უსაფრთხოების სტანდარტებით არის შემოწმებული. კენედის თქმით, ფაუჩის ადვოკატებმა მას განუცხადეს, რომ მსგავსი კვლევა არასდროს ჰქონიათ. ჰილსდეილის ღონისძიების დროს მას არ გაუჟღერებია მტკიცება, რომ  ფაუჩის თქმით, ბავშვთა 72 სავალდებულო ვაქცინიდან უსაფრთხოების ტესტირება  არცერთზე არ ჩატარებულა.

საგულისხმოა, რომ ფაქტების გადამმოწმებელი ორგანიზაცია  Lead Stories აღნიშნულ თემაზე დოქტორ ფაუჩის დაუკავშირდა, რომელმაც გავრცელებული მტკიცება უარყო.

ვაქცინის უსაფრთხოების შესახებ ინფორმაციას აშშ-ის დაავადებათა კონტროლისა და პრევენციის ცენტრი (CDC) ვებგვერდზე  ავრცელებს. ვაქცინის ტესტირება ხანგრძლივი პროცესია, რომელიც ლაბორატორიაში იწყება, სადაც მკვლევრები წლებს ატარებენ ვაქცინის უნარების შესასწავლად. კვლევის ეტაპების გავლის შემდეგ, აშშ-ის სურსათისა და წამლის ადმინისტრაცია (FDA) კლინიკური კვლევების მეშვეობით ადამიანებზე ტესტირების რეკომენდაციას გასცემს. კლინიკური კვლევები კი, თავის მხრივ, სამ ფაზად ტარდება:

ფაზა 1: კვლევა ტარდება  20-100 მოხალისეზე უსაფრთხოების, პოტენციური გვერდითი მოვლენებისა და დოზირების შესამოწმებლად;

ფაზა 2: მოიცავს ასობით მოხალისეს საერთო მოკლევადიანი გვერდითი მოვლენებისა და იმუნური პასუხის შესასწავლად;

ფაზა 3: მოიცავს ათასობით მოხალისეს ვაქცინის უსაფრთხოების, ეფექტურობისა და ნაკლებად გავრცელებული გვერდითი მოვლენების შესამოწმებლად.

თუ ვაქცინამ ყველა ფაზა წარმატებით გაიარა, აშშ-ს სურსათისა და წამლის ადმინისტრაცია (FDA) ამოწმებს მონაცემებს და ამტკიცებს მას. თავის მხრივ, FDA არის სააგენტო, რომელიც პასუხისმგებელია შეერთებულ შტატებში გამოყენებული ვაქცინების უსაფრთხოების, ეფექტურობისა და ხარისხის ზედამხედველობაზე. FDA-ს წარმომადგენელმა შემდეგი პასუხი გასცა The People’s Voice-ში გამოქვეყნებულ მტკიცებას: „შეერთებულ შტატებში ლიცენზირებული ბავშვებისა და მოზრდილებისთვის განკუთვნილი ყველა ვაქცინა დადასტურებულია კარგად კონტროლირებადი კლინიკური კვლევებით. FDA სხვადასხვა სისტემების გამოყენებით მათი ბაზარზე გასვლის შემდეგაც მათი უსაფრთხოების მონიტორინგს აგრძელებს. გარდა ამისა, FDA უზრუნველყოფს, რომ ვაქცინები წარმოებული იყოს მაღალი ხარისხით შემოწმებულ დაწესებულებებში, რომლებიც აკმაყოფილებენ მკაცრ სტანდარტებს. უნდა აღინიშნოს, რომ ვაქცინები საზოგადოებრივი ჯანდაცვის ერთ-ერთი ყველაზე ეფექტური ჩარევაა, რომელიც ყოველწლიურად მილიონობით სიცოცხლის გადარჩენაზეა პასუხისმგებელი“.